ឆ្លងចរន្តអគ្គិសនីឆេះឃ្លាំងជួសជុលរថយន្ត ១ កន្លែង នៅសង្កាត់ចោមចៅទី ២​ ខូចខាតរថយន្ត-ម៉ូតូ ៣ គ្រឿង និងសម្ភារៈមួយចំនួន

ឃ្លាំងជួសជុលរថយន្ត ១ កន្លែង ត្រូវបានអគ្គិភ័យឆាបឆេះយ៉ាងសន្ធោសន្ធៅបង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ច ចុះអន្តរាគមន៍​ កាលពីវេលាម៉ោង ១១ និង ១០ នាទីព្រឹក​ ថ្ងៃទី ២៤ ខែមេសា ឆ្នាំ ២០២៦ ស្ថិតតាមបណ្ដោយផ្លូវបេតុង ភូមិព្រៃល្វា សង្កាត់ចោមចៅទី ២ ខណ្ខពោធិ៍សែនជ័យ រាជធានីភ្នំពេញ។

ទីតាំងខាងលើមានទំហំ​ ​១៣ ម៉ែត្រ​ បណ្តោយ ២០ ម៉ែត្រ​ មានម្ចាស់ឈ្មោះ មាស ភក្តី ភេទប្រុស អាយុ ៤៧ ឆ្នាំ ជនជាតិខ្មែរ។ ក្នុងនោះ រងការខូចខាតរថយន្តម៉ាក​កូរូឡា​ ពណ៌ខៀវ​ ពាក់ស្លាកលេខ​ តាកែវ 2A1732 ១ គ្រឿង , ម៉ូតូចំនួន ២ គ្រឿង , ម៉ាស៊ីនរថយន្តចំនួន ៣ គ្រឿង , ប៉ុងជួសជុលរថយន្តចំនួន ១ គ្រឿង , និងសម្ភារៈគ្រឿងបន្លាស់រថយន្តមួយចំនួនទៀត។

ក្នុងប្រតិបត្តិការនេះ ប្រើប្រាស់​រថយន្ត​ពន្លត់​អគ្គិភ័យ​ស្នងការ​នគរបាល​រាជធានី​ភ្នំពេញ​ ចំនួន ៧ គ្រឿង ប្រើប្រាស់ទឹកអស់ ៤ ឡាន ស្មើនឹង ២៤ ម៉ែត្រគូប។ រថយន្តអគ្គិភ័យកងពលតូច ង ៧០ ចំនួន ៨ គ្រឿង ប្រើប្រាស់ទឹកអស់ចំនួន ៤ ឡាន ស្មើនឹង ៣០ ម៉ែត្រគូប។ រថយន្តអគ្គិភ័យក្រុមហ៊ុនស្រាបៀរកម្ពុជាចំនួន ១ គ្រឿង ប្រើប្រាស់ទឹកអសចំនួន ១ ឡាន ស្មើនឹង ៦ ម៉ែត្រគូប។

អគ្គិភ័យនេះ ពន្លត់ចប់នៅវេលាម៉ោង ១១ និង ៥០ នាទីព្រឹក ថ្ងៃខែឆ្នាំដដែល។ ដោយឡែកចំពោះមូលហេតុដែលបណ្តាលឲ្យកើតមានអគ្គិភ័យនេះមកពីឆ្លងចរន្តអគ្គិសនី៕
អត្ថបទ ៖ សុខា