សមត្ថកិច្ចស្រុកឯកភ្នំ ចុះបំផ្លាញទីតាំងជនខិលខូចរុករានទន្ទ្រាន និងឈូសឆាយដីព្រៃលិចទឹក

បន្ទាប់ពីទទួលបាន នូវណែនាំពីអាជ្ញាធរខេត្ត ស្តីពី ការទប់ស្កាត់រាល់បទល្មើស ការកាប់បំផ្លាញព្រៃលិចទឹក និងការទន្ទ្រានដីរដ្ឋយកមកធ្វើជាកម្មសិទ្ធិ តាមបទបញ្ជារបស់សម្តេចតេជោនាយករដ្ឋមន្ត្រី រួចមក ទាំងអាជ្ញាធរមូលដ្ឋាន ក៏ដូចជាកងកម្លាំង បានចេញប្រតិបត្តិការយ៉ាងសកម្ម ទៅតាមតំបន់នានាក្បែរបឹងទន្លេសាប ដើម្បីពិនិត្យទៅលើស្ថានភាពជាក់ស្តែង។

ចំណែកកម្លាំងអធិការដ្ឋាន នគរបាលស្រុកឯកភ្នំ សហការជាមួយកម្លាំងប៉ុស្តិ៍ នគរបាលរដ្ឋបាលពាមឯក និងប្រជាការពារ កាលពីល្ងាចថ្ងៃទី ៣០ ខែវិច្ឆិកា ឆ្នាំ ២០២១ បានចុះដុតរោងស្នាក់នៅ ជនដែលរុករានទន្ទ្រាន ឈួសឆាយដីព្រៃលិចទឹក បានមួយចំនួន។

ក្នុងកិច្ចប្រតិបត្តិការនេះ បានធ្វើឡើងនៅចំណុចអូរកំបុត និងបឹងទំនប់ ក្នុងភូមិសាស្ត្រឃុំពាមឯក ស្រុកឯកភ្នំ ខេត្តបាត់ដំបង ដែលតំបន់នេះ ជាអតីតឡូត៍នេសាទលេខ ៨។ នៅពេលដែលសមត្ថកិច្ចចុះទៅដល់ ជនឱកាសនិយមទាំងនោះ បានរត់គេចខ្លួនបាត់អស់ទៅហើយ ដោយបន្សល់តែសម្ភារ:ប្រើប្រាស់ និងគ្រឿងចក្រតែប៉ុណ្ណោះ។ បច្ចុប្បន្នសមត្ថកិច្ច បានដុតបំផ្លាញជម្រកចោលទាំងអស់ ព្រមទាំងបានសុំគោលការណ៍ថ្នាក់ដឹកនាំ ដើម្បីនាំយកគ្រឿងចក្រ យកមករក្សាទុកជាបណ្តោះអាសន្ន៕

អត្ថបទ៖ សោ និយមរ័ត្ន