ចាប់​រថយន្ត​ដឹក​​ស្រាបៀ និងបារីផលិត​នៅ​កម្ពុជា គេចពន្ធចូលទឹកដីថៃ

ទាហាន​ថៃ​បាន​ចាប់បាន​ស្រាបៀរដែលផលិតនៅកម្ពុជា រួមជាមួយបារីមួយចំនួន តាមរយ:រថយន្តមួយគ្រឿង ខណ:ដែលអ្នកបើកបរព្យាយាមគេចពីការត្រួតពិនិត្យរបស់សមត្ថកិច្ច។

នៅវេលាម៉ោងប្រមាណ ៧ និង ៣០ នាទី ព្រឹកថ្ងៃទី១ ខែធ្នូ ឆ្នាំ២០២១ កម្លាំងកងរយលេខ១៣ បានដាក់ឈរជើងនៅចំណុចខ្លងក្លាង ស្ថិតក្នុងស្រុកថាតាក់កៀប ខេត្តឆ:ឈើងសៅ ជាប់ព្រំប្រទល់ខេត្តស្រះកែវ ដើម្បីត្រួតពិនិត្យមើលបទល្មើសនានា ពិសេសគឺសង្គេតទៅលើទំនិញគេចពន្ធ ដែលនាំចូលទៅក្នុងប្រទេសថៃខុសច្បាប់។

បន្ទាប់ពីមានការសង្ស័យទៅលើរថយន្តមួយគ្រឿងម៉ាកតូយ៉ូតា ពាក់ស្លាកលេខ បាងកក ១៩៧៣ រួចមក សមត្ថកិច្ចក៏បានឃាត់ដើម្បីត្រួតពិនិត្យ។ ជាក់ស្តែងនៅគូទរថយន្ត គេបានរកឃើញស្រាបៀរ ហ្គេនបឺត ចំនួន ២១ កែស ស្រាបៀរអាន់ឆ័រ ចំនួន១០កែស ស្រាបៀរឆ្មាខ្មៅ ចំនួន៥កែស និងបារីចំនួន ១៣ សុង ដែលជាទំនិញគេចពន្ធ ចេញតាមច្រករបៀងពីកម្ពុជា។

អ្នកបើកបរបានសារភាពថា បានទិញពីផ្សារក្នុងស្រុកសយដាវ ខេត្តច័ន្ទបុរី ដែលនៅជាប់និងព្រំប្រទល់ស្រុកកំរៀង ខេត្តបាត់ដំបង ដើម្បីយកទៅលក់បន្តនៅខេត្តឈុនបុរី ប៉ុន្តែក៏ត្រូវសមត្ថកិច្ចចាប់បាន។

បច្ចុប្បន្នអ្នកបើកបររួមទាំងទំនិញទាំងអស់នេះ សមត្ថកិច្ចបានប្រគល់ទៅអោយសាខាគយ ភ្នំសារ:ខាម ក្នុងខេត្ត​ឆ:ឈើងសៅ ​ដើម្បីអនុវត្តតាមផ្លូវច្បាប់៕

អត្ថបទ៖ សោ និយមរ័ត្ន