ចាប់​បាន​ជន​សង្ស័យពីរ​នាក់​ជាក់ស្តែង ប៉ុនប៉ង​ចរាចរ​លុយដុល្លារក្លែងក្លាយ

ខេត្តបាត់ដំបង÷ ជនសង្ស័យពីរនាក់ ត្រូវ​បាន​សមត្ថកិច្ច​ឃាត់ខ្លួនករណីចរាចរណ៍រូបិយវត្ថុណក្លែងក្លាយរួមទាំងករណីប៉ុនប៉ងលួចម៉ូតូ។

ជនសង្ស័យចំនួន០២នាក់មានឈ្មោះម៉ាន សំណាងភេទប្រុសអាយុ២៣ឆ្នាំ និងឈ្មោះថិត សា ភេទស្រីអាយុ១៦ឆ្នាំទាំងពីរនាក់មានទីលំនៅក្នុងសង្កាត់ទួលសង្កែ ខណ្ឌឫស្សីកែវ រាជធានីភ្នំពេញ។

ប្រភព​ពី​សមត្ថកិច្ច​បាន​ឲ្យ​ដឹង​ថា ក្រោយទទួលបានពាក្យបណ្តឹងពីជនរងគ្រោះជាអាជីវករភ្លាម កម្លាំងផ្នែកជំនាញបានចុះសាកសួរនិងនាំខ្លួនជនជាប់សង្ស័យបានភ្លាមៗនៅកន្លែងកើតហេតុត្រង់ចំណុចតូបលក់អីវ៉ាន់ផ្ទះជនរងគ្រោះស្ថិត​ក្នុងចំណុចភូមិជំនីក ឃុំអន្លង់វិល ស្រុកសង្កែខេត្ដបាត់ដំបង។

សមត្ថកិច្ចបន្តថា ជនសង័្សយនៅថ្ងៃកើតហេតុ បានធ្វើសកម្មភាពយកក្រដាសប្រាក់ដុល្លារក្លែងក្លាយទៅទិញអីវ៉ាន់របស់​ជនរងគ្រោះឈ្មោះឆាយ សុភាព ភេទប្រុសអាយុ៣៤ឆ្នាំ ខណ:ជនរងគ្រោះមានការសង្ស័យក៏បានទូរស័ព្ទប្រាប់នគរបាលមូលដ្ឋានដើម្បីមានចំណាត់ការតែម្តង។

ក្រោយឃាត់ខ្លួនសមត្ថកិច្ចដកហូតបានក្រដាសប្រាក់ដុល្លារក្លែងក្លាយប្រភេទ៥០ដុល្លាសហរដ្ឋអាមេរិកចំនួន ០៦ សន្លឹក និង​ដែកកែងចុងស្រួចរាងអក្សរអិលសម្រាប់កាច់សោរកម៉ូតូចំនួន០១ និងម៉ូតូ០១គ្រឿងម៉ាកហុងដាទ្រីមស៊េរីឆ្នាំ២០១៧។

ជនសង្ស័យទាំង២នាក់រួមនិងវត្ថុតាងនៅថ្ងៃទី២៣ខែធ្នូនេះ ត្រូវ​បាន​កម្លាំងបង្ក្រាបរៀបចំសំណុំរឿងបញ្ជូនមកការិយាល័យជំនាញ​ដើម្បីចាត់ការបន្តតាមនីតិវិធី៕

អត្ថបទ៖ សៅ សារិទ្ធ