​ឃាត​កម្ម​សម្លាប់​ទាំង​គ្រួសារ​ នៅ​មណ្ឌលគិរី ជិតមានពន្លឺ ខណៈ​ក្មេង​ប្រុស​រួចជីវិត​បញ្ជូន​ទៅ​សង្គ្រោះ​នៅ​ភ្នំពេញ

ស្នងការនគរបាលខេត្តមណ្ឌលគិរី លោក ឡោ សុខា បានប្រាប់សារព័ត៌មានកម្ពុជាថ្មី នៅរសៀល​ថ្ងៃទី ០៤ ខែកុម្ភៈ ឆ្នាំ ២០២២ នេះ ឱ្យដឹងថា ករណីឃាតកម្មបង្កឱ្យ​ស្លាប់មនុស្ស​ចំនួន៥នាក់ និង​រងរបួសធ្ងន់ម្នាក់ នៅខេត្តមណ្ឌលគីរី មានក្រុមការងារចម្រុះចូលរួមស៊ើបអង្កេត កំពុងបន្តស៊ើប​អង្កេតបទល្មើសឃាតកម្មនេះ។

លោក ឡោ សុខា បង្ហើបថា ករណីឃាតកម្មនេះ មានការចូលរួម ពីមន្ត្រីព្រហ្មទណ្ឌ​ក្រសួង​មហាផ្ទៃ និងបច្ចេកទេស មន្ត្រីកោសលវិច័យ និងអង្គភាពការពារកុមារ។

ក្រុមការងារចម្រុះ ALPHA22 ត្រូវបានបង្កើតឡើងដើម្បីធ្វើការស៊ើបអង្កេតទៅលើអំពើឃាតកម្មទៅលើក្រុមគ្រួសារដែលមានសមាជិក៥នាក់ និងអំពើប៉ុនប៉ងសម្លាប់ទៅលើកុមារម្នាក់ទៀត។

ក្រុមការងារច្រុះត្រូវបានបង្កើតឡើងដើម្បីធ្វើការស៊ើបអង្កេតទៅលើករណីឃាតកម្មទៅលើមនុស្សពេញវ័យ២នាក់ និងកុមារ៣នាក់ ថែមទាំងប៉ុនប៉ងសម្លាប់ទៅលើកុមារម្នាក់ទៀតផងដែរ ដែលបានកើតឡើងនៅខេត្តមណ្ឌលគីរីកាលពីថ្ងៃទី១ ខែកុម្ភៈ ឆ្នាំ២០២២។

ក្រុមការងារចម្រុះនេះគឺត្រូវបានបង្កើតឡើងដោយមានកិច្ចសហប្រតិបត្តិការរវាងស្នងការដ្ឋាននគរបាលខេត្តមណ្ឌលគីរី, នាយកដ្ឋានព្រហ្មទណ្ឌកម្រិតធ្ងន់ និងនាយកដ្ឋានបច្ចេកទេស​ និងវិទ្យាសាស្រ្តនៃក្រសួងមហាផ្ទៃ, ក្រុមការងារស៊ើបអង្កេតបទល្មើសឃាតកម្ម និងក្រុមការងារបច្ចេកទេសវិទ្យាសាស្រ្តនៃអង្គភាពការពារកុមារ (CPU)។

មន្ត្រីជំនាញបានចំណាយរយៈពេល២ថ្ងៃ កាលពីថ្ងៃទី ២ និងទី៣ ដើម្បីធ្វើការពិនិត្យកន្លែងកើតហេតុមួយចំនួន ស្ថិតនៅក្នុងតំបន់ដាច់ស្រយ៉ាលនៅក្នុងព្រៃនៃខេត្តមណ្ឌលគីរី។

លោក James McCabe នាយកប្រតិបត្តិអង្គភាពការពារកុមារ បានមានប្រសាសន៍ ក្រុមការងារពិតជាមានភាពលំបាកជាច្រើនដើម្បីធ្វើដំណើរទៅកាន់កន្លែងកើតហេតុនេះ ហើយថា នេះគឺពិតជាអំពើដ៏ឃោឃៅមួយដែលត្រូវបានប្រព្រឹត្តឡើងទៅលើក្រុមគ្រួសារ និងសហគមន៍ដ៏តូចនេះ។

ក្មេងប្រុសដែលនៅមានជីវិត ក្នុងករណីឃាតកម្មទាំងគ្រួសារនៅខេត្តមណ្ឌលគិរី ត្រូវបានក្រុមគ្រូពេទ្យបញ្ជូនទៅសង្គ្រោះនៅមន្ទីរពេទ្យកុមារជាតិ នៅរាជធានីភ្នំពេញ នាយប់ថ្ងៃទី ៣ ខែកុម្ភៈ បន្ទាប់ពីស្ថានភាពជំងឺមិនសូវល្អ។

ធនធានដែលយើងមានទាំងប៉ុន្មាននឹងត្រូវបានយកមកប្រើប្រាស់ ដើម្បីកំណត់អត្តសញ្ញាណរាល់ជនល្មើសដែលពាក់ព័ន្ធនឹងសកម្មភាពនេះ។កុមារអាយុ ១២ឆ្នាំម្នាក់ត្រូវបានបញ្ជូនទៅទទួលការសង្គ្រោះបន្ទាន់នៅរាជធានីភ្នំពេញ បន្ទាប់ពីបានរងរបួសដ៏ធ្ងន់ធ្ងរ ដែលបង្កអោយមានគ្រោះថ្នាក់ដល់អាយុជីវិត។

ស្នងការដ្ឋាននគរបាលខេត្តមណ្ឌលគីរី និងអង្គភាពការពារកុមារ នឹងបន្តផ្តល់ការគាំទ្រ និងជំនួយទៅដល់កុមាររងគ្រោះនេះ និងក្រុមគ្រួសារគេ។

ប្រសិនបើមានមហាជនណាដែលមានពត៌មានបន្ថែមពាក់ព័ន្ធនឹងសកម្មភាពនេះ សូមរាយការណ៍ជូនទៅកម្លាំងសមត្ថកិច្ច ឬអង្គភាពការពារកុមេរ។

សូមជំរាបថា ករណីឃាតកម្ម បានកើតឡើង នៅចំណុចស្រែចោល ក្នុងភូមិមេប៉ៃ ឃុំពូជ្រៃ ស្រុកពេជ្រាដា ខេត្តមណ្ឌលគិរី កាលពីវេលាម៉ោង ១១៖៣០ យប់ ថ្ងៃទី ១ ខែកុម្ភៈ បណ្ដាល​ឱ្យ​មនុស្សចំនួន ៥ នាក់ ក្នុងចំណោម ៦ នាក់ក្នុងគ្រួសារ បានស្លាប់បាត់បង់ជីវិត។

ជនរងគ្រោះដែលស្លាប់ ជាជនជាតិព្នង ទី១ មានឈ្មោះ ម៉ូត ក្រាក់ ភេទប្រុស អាយុ ៤៥ ឆ្នាំ ទី២ ឈ្មោះ ក្រាក់ លី ភេទប្រុស អាយុ ១៥ ឆ្នាំ ទី៣ ឈ្មោះ នួន សំអាត ភេទប្រុស អាយុ ១៥ ឆ្នាំ ទី៤ ឈ្មោះ និច ស្រី ភេទស្រី អាយុ ៤១ ឆ្នាំ ទី ៥ ឈ្មោះ ក្រាក់ នី ភេទ ប្រុស អាយុ ០៥ ឆ្នាំ អ្នកទាំង ៥ ស្លាប់បាត់បង់ជីវិត និងទី៦ ឈ្មោះ ក្រាក់ ស្ល៊ី ភេទ ប្រុស អាយុ ១២ ឆ្នាំ រងរបួសធ្ងន់៕