សន្តិសុខសង្គម

ឃាតកដែលសម្លាប់មួយគ្រួសារ នៅខេត្តមណ្ឌលគិរី ត្រូវសមត្ថកិច្ចចាប់បានហើយ

បានផុស

៤ years មុន

នៅ

ថ្ងៃអាទិត្យ ៦ កុម្ភៈ ២០២២

ដោយ

ទីបំផុត ជនដៃដល់ដែលបានសម្លាប់មួយគ្រួសារ នៅខេត្តមណ្ឌលគិរី កាលពីថ្ងៃទី ០១ ខែកុម្ភៈ ឆ្នាំ ២០២២ ត្រូវសមត្ថកិច្ចឃាត់ខ្លួនបានអស់ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី ៥ ខែកុម្ភៈ ឆ្នាំ ២០២២ វេលាម៉ោង ១៨ កម្លាំងជំនាញនៃស្នងការដ្ឋាននគរបាលខេត្តមណ្ឌលគិរី សហការជាមួយកម្លាំងជំនាញនៃនាយកដ្ឋាននគរបាលព្រហ្មទណ្ឌ កម្លាំងនាយកដ្ឋាននគរបាលបច្ចេកទេស និងវិទ្យាសាស្ត្រ បានស្រាវជ្រាវស៊ើបអង្កេតករណីឃាតកម្ម សម្លាប់មនុស្សចំនួន ៥ នាក់ និងរបួសធ្ងន់ ០១ នាក់ កាលពីថ្ងៃទី ០១ ខែកុម្ភៈ ឆ្នាំ២០២២ វេលាម៉ោង ១៣ និង ៣០ នាទី នៅចំណុចស្រែចោទ ស្ថិតនៅក្នុងភូមិមេប៉ៃ ឃុំពូជ្រៃ ស្រុកពេជ្រាដា ខេត្តមណ្ឌលគិរី។

ក្នុងកិច្ចប្រតិបត្តិការនេះ ឃាត់ខ្លួនជនសង្ស័យចំនួន ៦ នាក់ ក្នុងនោះជនដៃដល់ចំនួន ៤ នាក់ និងអ្នកបញ្ជាញុះញង់ឲ្យសម្លាប់ចំនួន ២ នាក់ រួមមាន ១. ធី ម្ពៀត ហៅព្សឹត ភេទប្រុស អាយុ ១៨ ឆ្នាំ ជនជាតិព្នង ជាមេខ្លោងផ្តើមគំនិត, ២. រឹម ធា ភេទប្រុស អាយុ ២៧ ឆ្នាំ ជនជាតិខ្មែរ (សហចារី), ៣. នឹម ខ្លាខឹន ភេទប្រុស អាយុ ១៨ ឆ្នាំ ជនជាតិខ្មែរ (សហចារី), ៤. ធី ព្យឹត ភេទប្រុស អាយុ ១៤ ឆ្នាំ ជនជាតិព្នង (សហចារី), ៥. ក្លឹង ចន្ធី ភេទប្រុស អាយុ ៤០ ឆ្នាំជនជាតិព្នង (បញ្ជាឲ្យសម្លាប់), ៦. នួន វណ្ណា ភេទប្រុស អាយុ ៥៤ ឆ្នាំ ជនជាតិខ្មែរ (បញ្ជាឲ្យសម្លាប់) ជនសង្ស័យទាំង ០៦ នាក់ស្នាក់នៅភូមិឡៅការ សង្កាត់សុខដុម ក្រុងសែនមនោរម្យ ខេត្តមណ្ឌលគិរី។

ជនសង្ស័យបានផ្ដល់ចម្លើយសារភាពថា មូលហេតុដែលសម្លាប់ជនរងគ្រោះទាំង ៥ នាក់ និងរងរបួសធ្ងន់ម្នាក់ ដោយសាររឿងគំនុំ បច្ចុប្បន្នជនដៃដល់ត្រូវបានឃាត់ខ្លួន ដើម្បីកសាងសំណុំរឿងបញ្ជូនទៅសាលាដំបូងខេត្តចាត់ការតាមនីតិវិធី៕

អត្ថបទ៖ វុទ្ធឦសាន