បទល្មើសឆក់កាបូបនិងទ្រព្យសម្បត្តិពីពលរដ្ឋកំពុងកើតមានច្រើននៅកណ្តាលក្រុងដូនកែវ

ប៉ុន្មានថ្ងៃដើមខែមេសា មុនចូលឆ្នាំខ្មែរនេះកើតមានករណីចោរឆក់ទ្រព្យសម្បត្តិតាមដងផ្លូវពីប្រជាពលរដ្ឋកណ្តាលក្រុងដូនកែវ ផ្ទួនៗ បានសម្រេចដោយមិនរំខានសមត្ថកិច្ចនោះទេ។

ករណីទីមួយកើតនៅថ្ងៃទី០១ ខែមេសា ឆ្នាំ២០២២ ម៉ោង១០និង៤៥នាទី ស្ថិតនៅចំនុចផ្លូវជាតិលេខ២ ខាងមុខសាលាឆទានភូមិត្រាំ សង្កាត់រកាក្រៅ ក្រុងដូនកែវ លើអ៊ំប្រុសម្នាក់ ដោយក្រុមចោរមានគ្នា៣នាក់ ជិះម៉ូតូ២គ្រឿងvivaមួយនិងមួយគ្រឿងទៀតមិនស្គាល់។ អ៊ំប្រុសជាជនរងគ្រោះបានបញ្ជាក់ថា ក្រុមចោរបានបន្លំធ្វើជាសួរគាត់ថាមានស្គាល់គ្រូខ្មែរណាព្យាបាលតឆ្អឹងបាក់ដែរឺទេ? ស្រាប់តែមួយសន្ទុះក្រោយមកចាប់ដៃម្ខាងរបស់គាត់និងបានដោះយកចិញ្ចៀនមាស៥ជីបានសម្រេចដោយសុវត្ថិភាព (ជាករណីអាចដាក់ថ្មាំ)។

ករណីទី២ កើតឡើងនៅវេលាម៉ោង១៤និង១២នាទីរសៀលថ្ងៃទី០៤ ខែមេសា ឆ្នាំ២០២២ នៅលើផ្លូវជាតិលេខ២​ចំណុច​ហាងលក់បាយភូមិត្រាំ សង្កាត់រកាក្រៅ ក្រុងដូនកែវ លើស្រ្តីពីរនាក់បងប្អូននិងកូនប្រុសម្នាក់។ ស្ត្រីជាជនរងគ្រោះបានបញ្ជាក់ថា ពួកគាត់ធ្វើដំណើរពីផ្សារល្វេមកផ្សារតាកែវដើម្បីទិញអីវ៉ាន់នៅផ្សារធំតាកែវ លុះមកដល់ចំណុចខាងលើក៏ត្រូវបានក្រុមចោរមានគ្នាពីរនាក់ជិះម៉ូតូឌ្រីមសង់គ្មានមានស្លាកលេខ ពាក់អាវខ្មៅទាំងពីរ គ្មានមួកសុវត្ថិភាព បានធ្វើសកម្មភាពឆក់កាបូបពួកគាត់បានសម្រេចដោយសុវត្ថិភាព។

ស្ត្រីរងគ្រោះបានបញ្ជាក់ថា ក្នុងការបូបដែលចោរឆក់រួមមាន ទូរស័ព្ទដៃ១គ្រឿងម៉ាកអូប៉ូ, ខ្សែករមាសមួយខ្សែទំងន់០៤ជី, លុយខ្មែរចំនួន៣,៥០០,០០០រៀល និងក្រវិលកំប៉ុងស្រាបៀរជាច្រើនទៀតផងដែរ។

ពាក់ព័ន្ធនឹងភាពអសន្តិសុខក្នុងក្រុងដូនកែវនេះ លោក ឥន្ធ មណ្ឌល អធិការនគរបាលក្រុងដូនកែវ បានឲ្យដឹងនៅព្រឹកថ្ងៃទី០៥ ខែមេសា ឆ្នាំ២០២២នេះថា ជាមុខសញ្ញាថ្មីដែលជំនាញលោកនៅមិនទាន់កំណត់មុខសញ្ញាបាននៅឡើយ។

លោកអធិការបញ្ជាក់ថា មានការថតជាប់ក្នុងកាំមេរ៉ាសុវត្ថិភាពតាមផ្ទះរបស់ប្រជាពលរដ្ឋពេលក្រុមចោរធ្វើសកម្មភាពដែរ តែរូបភាពមើលមិនច្បាស់៕

អត្ថបទ៖ វីរៈ