ករណី​បាត់​លុយ​ជិត​១លាន​ដុល្លារ​​នៅ​ពោធិ៍សាត់​​ សមត្ថកិច្ច​ឈាន​ទៅ​ប្រើ​ឆ្កែ​ហិត​ក្លិន​ និង​ឃាត់​ខ្លួន​​​មនុស្ស​បី​នាក់​សាក​សួរ​

ករណី​ក្រុម​ចោរមាន​គ្នា​ ៤ នាក់ ​លួចចូលគាស់​ទូដែកក្នុងរោងចក្រ តៃអ៊ីហ្ស៊ី យកលុយ ជិត១លាន​ដុល្លារ (៩៨១ ០០០) នៅវេលា​យប់ម៉ោង ១ រំលងអធ្រាត្រ ឈានចូលថ្ងៃទី ១០ ខែឧសភា ​សមត្ថកិច្ច​កំពុងប្រើឆ្កែហិតក្លិន​តាមតម្រុយ​ជនសង្ស័យ។

ប្រភពព័ត៌មាន​បង្ហើបថា តាមរយៈឆ្កែហិតក្លិន​ពេលនេះប៉ះជនសង្ស័យ ៣ នាក់ម្នាក់ជាជន​ជាតិ​ចិន​ម្នាក់​ សន្តិសុខម្នាក់ និងម្នាក់ទៀតជាអ្នកគ្រប់គ្រងកាម៉េរ៉ាសុវត្ថិភាព ហើយសមត្ថកិច្ចកំពុង​សួរនាំមិនទាន់មានលទ្ធផល។

កាលពីព្រឹកថ្ងៃទី ១០ ខែឧសភា មានការភ្ញាក់ផ្អើលករណីក្រុមចោរមួយក្រុម​បានចូលគាស់ទូដែកក្នុងរោងចក្រ តៃអ៊ីហ្ស៊ី យកលុយ ជិត១លាន​ដុល្លារ (៩៨១ ០០០)។

ក្រោយកើតហេតុ សមត្ថកិច្ច បានបញ្ចេញកាមេរ៉ាសុវត្ថិភាព ឃើញមានក្រុមជនសង្ស័យ ៤ បានធ្វើសកម្មភាពប្រមាណ ៣០ នាទី នៅវេលាម៉ោង ១៖៣៧ នាទី យប់ថ្ងៃទី ១០ ខែឧសភា នៅក្នុងក្រុមហ៊ុនរោងចក្រ តៃអ៊ីហ្ស៊ី ស្ថិតក្នុងភូមិទទឹង ឃុំអន្លង់ត្នោត ស្រុកក្រគរ ខេត្តពោធិ៍សាត់៕

អត្ថបទ៖ លាន គ្រន