ស៊ុតមាន់ និងស៊ុតគ្រួចជិត ២ម៉ឺនគ្រាប់​លួចដឹកពីវៀតណាម ចូលកម្ពុជា

ឈ្មួញ បានលួចនាំចូលស៊ុតមាន់ និងស៊ុតគ្រួចប្រមាណជិត ២ម៉ឺនគ្រាប់ នៅពាក់កណ្តាលយប់ថ្ងៃទី ២៦ ខែ កក្កដា ដោយឆ្លងកាត់តាមច្រកស្រុកព្រះស្តេច ខេត្តព្រៃវែង ត្រូវសមត្ថកិច្ចក្នុងតំបន់ឃាត់ ដើម្បីត្រួតពិនិត្យ។

អាជ្ញាធរ បានប្រាប់អ្នកសារព័ត៌មានថា នៅវេលាម៉ោង០១ និង១២នាទីយប់ ថ្ងៃទី២៦ ខែកក្កដា ឆ្នាំ២០២២ ដោយមានការបញ្ជាដោយផ្ទាល់ពីលោក តាន់ ផាន់ណារ៉ា ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក​នៃអគ្គនាយកដ្ឋានសុខភាពសត្វ និងផលិតកម្មសត្វ ឲ្យក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ សហការជាមួយការិយាល័យផលិតកម្ម និងបសុព្យាបាល​នៃមន្ទីរកសិកម្មខេត្តព្រៃវែង ចុះស្ទាក់ចាប់រថយន្ត០១គ្រឿង ម៉ាក Ssangyong istana ពណ៌សម្បកឪឡឹក ជាប្រភេទរថយន្តដឹកឣ្នកដំណើរ១៥កៅឣី ពាក់ស្លាកលេ ខភ្នំពេញ ២AE-៧៣៧០ ដឹកផលិតផល​មានដើមកំណើតពីសត្វ (ស៊ុតមាន់ចំនួន ៣០០០គ្រាប់ និងស៊ុតគ្រួចចំនួន ១៦០០០គ្រាប់) ដោយនាំចូល​ពីប្រទេសវៀតណាម មកកាន់ប្រទេសកម្ពុជា តាមច្រកបន្ទាយចក្រី ស្រុកព្រះស្ដេច ខេត្តព្រៃវែង បម្រុងនឹង​យកទៅចែកចាយនៅរាជធានីភ្នំពេញ ដោយគ្មានលិខិតអនុញ្ញាត ។

ករណីនេះ សមត្ថកិច្ច បានឃាត់នៅលើចំណុច ភូមិក្រូច ឃុំអង្គររាជ្យ ស្រុកព្រះស្ដេច ខេត្តព្រៃវែង។

ក្រោយត្រួតពិនិត្យសមត្ថកិច្ច បាននាំយកវត្ថុតាងទាំងនោះ ទៅរក្សាទុកនៅទីតាំងចត្តាឡីស័កសត្វ របស់អគ្គនាយកដ្ឋានសុខភាពសត្វ និងផលិតកម្មសត្វ ដើម្បីចាត់ការទៅតាមនីតិវិធីច្បាប់៕