ខឹងប្រពន្ធដើមឃាត់មិនឲ្យដឹកស្រូវទៅផ្ទះប្រពន្ធចុង ទាញពូថៅកាប់សម្លាប់ផ្កាប់មុខក្នុងភ្នក់ភ្លើង

បុរសជាប្ដីវ័យ៥៦ឆ្នាំម្នាក់ត្រូវបានកម្លាំងនគរបាលព្រហ្មទណ្ឌនៃស្នងការដ្ឋាននគរបាលខេត្តក្រចេះ ធ្វើការឃាត់ខ្លួន បន្ទាប់ពីកាប់សម្លាប់ស្ត្រីរងគ្រោះជាប្រពន្ធបណ្ដាលឲ្យស្លាប់ផ្កាប់មុខក្នុងភ្នក់ភ្លើង។

ការឃាត់ខ្លួនជនដៃដល់ក្នុងអំពើកាប់សម្លាប់នេះបានធ្វើឡើងកាលពីថ្ងៃទី២៧ ខែកក្កដា ឆ្នាំ២០២២ បន្ទាប់ពីមានអំពើឃាតកម្មកើតឡើងនៅភូមិថ្មគ្រែកណ្តាល ឃុំថ្មគ្រែ ស្រុកចិត្របុរី ខេត្តក្រចេះ។

តាមរបាយការណ៍សមត្ថកិច្ចបានឲ្យដឹងថា ជនដៃដល់ជាប្ដីមានឈ្មោះ មាន ឈាងនី អាយុ៥៦ឆ្នាំ ចំណែកស្រ្តីរងគ្រោះជាប្រពន្ធមានឈ្មោះ ក្តាន់ យេម អាយុ៦២ឆ្នាំ រស់នៅកន្លែងកើតហេតុ។

របាយការណ៍បានបញ្ជាក់ថា តាមចម្លើយសារភាពរបស់ជនដៃដល់បានឆ្លើយថា កាលយប់ថ្ងៃកើតហេតុទី២៦ ខែកក្កដា រូបគេបានធ្វើសកម្មភាពយកពូថៅកាប់ទៅលើស្រ្តីរងគ្រោះជាប្រពន្ធចំកញ្ចឹងកខាងឆ្វេង បណ្តាលអោយដួលផ្កាប់មុខនៅក្នុងភ្នក់ភ្លើងស្លាប់នៅកន្លែងនៅមុខខ្ទមស្រែ ដោយសារតែខឹងស្រ្តីរងគ្រោះជាប្រពន្ធមិនអោយរូបគេដឹកស្រូវយកទៅអោយផ្ទះប្រពន្ឋចុង។

ជនដៃដល់ត្រូវបានឃាត់ខ្លួនយកមកស្នងការដ្ឋាននគរបាលខេត្តក្រចេះ ដើម្បីកសាងសំណុំរឿងបញ្ជូនបន្តទៅតុលាការកាត់ទោសតាមផ្លូវច្បាប់៕

អត្ថបទ៖ សុខុម