អគ្គិភ័យឆេះឃ្លាំងលក់រថយន្ដ២កន្លែងជាប់គ្នាទាំងកណ្ដាលយប់ខូចខាតរថយន្ដស៊េរីទំនើប១០គ្រឿង (មានវីដេអូ)

ឃ្លាំងលក់រថយន្ដស៊េរីទំនើបចំនួន២កន្លែងជាប់គ្នា ត្រូវបានអគ្គិភ័យឆាបឆេះយ៉ាងសន្ធោសន្ធៅបណ្ដាលឲ្យខូចខាតរថយន្ដចំនួន១០គ្រឿង និងសម្ភារៈមួយចំនួនធំ។

ករណីអគ្គិភ័យនេះ បានកើតឡើងកាលពីវេលាម៉ោង២និង០០នាទី រំលងអាធ្រាត្រ ឈានចូលថ្ងៃទី២៧ ខែសីហា ឆ្នាំ២០២២ នៅចំណុចឃ្លាំងលក់រថយន្ដលេខ177 និងឃ្លាំងលក់រថយន្ដ Davan162 នៅតាមបណ្ដោយផ្លូវលេខ ២៧៣កែង៦០៨ ភូមិទី១៤ សង្កាត់បឹងកក់ទី១ ខណ្ឌទួលគោក រាជធានីភ្នំពេញ។

លោក ជា ពិសី អភិបាល នៃគណអភិបាលខណ្ឌទួលគោក បានឲ្យដឹងថា ករណីអគ្គិភ័យនេះបណ្ដាលឲ្យខូលខាត​រថយន្ដ១០គ្រឿង និងសម្ភារៈមួយចំនួន តែមិនបង្កឲ្យមានគ្រោះថ្នាក់ដល់អាយុជីវិតប្រជាពលរដ្ឋឡើយ។ លោកអភិបាលបានបន្ថែមថា ករណីអគ្គិភ័យនេះ តាមព័ត៌មានបឋមគឺកើតឡើងដោយសារឆ្លងចរន្តអគ្គិសនី។

អភិបាលខណ្ឌរូបនេះបានបញ្ជាក់ថា បន្ទាប់ពីទទួលបានព័ត៌មាន លោកបានដឹកនាំកម្លាំងគណៈបញ្ជាការឯកភាពខណ្ឌ សហការជាមួយកម្លាំងការិយាល័យបង្ការពន្លត់អគ្គិភ័យ និងសង្គ្រោះ នៃស្នងការនគរបាលរាជធានីភ្នំពេញ ចុះអន្តរាគមន៍នៅកន្លែកើតហេតុរហូតដល់ម៉ោង២និង៣០នាទី ទើបអាចគ្រប់គ្រងស្ថានការណ៍បានទាំងស្រុង៕

អត្ថបទ៖ សុខុម