អាជ្ញាធរខេត្តសៀមរាប​បានជួយសម្រួល​ដល់ការធ្វើដំណើរពលរដ្ឋដែលជឿតាមលោក ខឹម ​វាសនាត្រឡប់ទៅផ្ទះវិញ​

នៅព្រឹកថ្ងៃទី ៣១ ខែសីហានេះ អភិបាលខេត្តសៀមរាប លោក ទៀ សីហាបានឲ្យដឹងថា អាជ្ញាធរខេត្តនៅបន្តសម្របសម្រួលជួយដល់ប្រជាពលរដ្ឋ​ដែលមានបំណងចាកចេញពីដីចម្ការរបស់លោក ខឹម វាសនា នៅជើងភ្នំគូលែន ទៅកាន់លំនៅឋានវិញ។

លោកអភិបាលខេត្តបញ្ជាក់ថា អាជ្ញាធរខេត្តសៀមរាបកំពុងបន្តបិទមិនឲ្យប្រជាពលរដ្ឋចូលមក ក្នុង​តំបន់ហាមឃាត់ និងអំពាវនាវដល់បងប្អូនដែលកំពុងស្នាក់នៅក្នុងចម្ការរបស់លោក ខឹម វាសនា ឲ្យចាក​ចេញទៅកាន់លំនៅស្ថានវិញ​ ព្រោះអាជ្ញាធរយល់ថា​ ពួកគាត់មានផលប៉ះពាល់ខ្លាំង​ដល់សុខ​មាលភាពទាំងមនុស្សចាស់ និងកុមារ ប្រឈមមុខនឹងជំងឺឆ្លងផ្សេងៗ ជាពិសេសជម្ងឺកូវីដ១៩ និង បាត់បង់ការងារធ្វើ កុមារមិនបានសិក្សារៀនសូត្រ ខាតបង់ទ្រព្យសម្បត្តិផ្ទាល់ខ្លួនជាដើម។

លោក ទៀ សីហា បញ្ជាក់ថា មកដល់ថ្ងៃទី ៣១ ខែសីហានេះហើយ នៅមិនទាន់មានហេតុការណ៍​ណា​មួយបានកើតឡើង ដូចការប្រកាសរបស់លោក ខឹម វាសនា នោះឡើយ។ មកដល់ពេលនេះ កងកម្លាំងសមត្ថកិច្ចក៏បានត្រៀមខ្លួនរួចជាស្រេច តែក៏មិនមានការប៉ះទង្គិច​ណាមួយរវាងកម្លាំង​សមត្ថកិច្ច និងកម្លាំងគណបក្ស LDP ឡើយ។

ក្នុងនោះអាជ្ញាធរខេត្តកំពុងបន្តសម្របសម្រួល នឹងបានត្រៀមនូវមធ្យោបាយធ្វើដំណើររួចជាស្រេច សម្រាប់បងប្អូនប្រជាពលរដ្ឋ ដែលបានស្ម័គ្រចិត្តចាកចេញពីចម្ការរបស់លោក ខឹម វាសនា នៅជើងភ្នំគូលែន ដើម្បីទៅកាន់បណ្តាខេត្ត និង លំនៅឋានរបស់ខ្លួនវិញ មិនថាសមាជិក​របស់គណបក្សLDPក្តីឬក៏អ្នកមកពីក្រៅ មកពីកូរ៉េ និងមកពីជប៉ុនក្តី គឺសុទ្ធតែជាប្រជាពលរដ្ឋខ្មែរយើងទាំងអស់៕

អត្ថបទ៖ គឿនវេត