Connect with us

សន្តិសុខសង្គម

ប្រពន្ធ និង​ឃាតក​ស៊ីឈ្នួល​សម្លាប់​​ប្តី នៅ​ស្រុក​កៀនស្វាយ អាច​ប្រឈមមុខ​ជាប់ពន្ធនាគារ​អស់​មួយជីវិត

បានផុស

នៅ

កណ្តាល​ ៖ លោក អឿង វណ្ណា ចៅក្រម​ស៊ើបសួរ​សាលាដំបូង​ខេត្ត​កណ្តាល​នៅ​ល្ងាច​ថ្ងៃទី​១៦ ខែមករា ឆ្នាំ​២០២៣ បានសម្រេច​ចេញ​ដីកា​ឃុំខ្លួន​ប្រពន្ធ និង​ឃាតក​ស៊ីឈ្នួល​សម្លាប់​បុរស​ជា​ប្តី នៅ​ស្រុក​កៀនស្វាយ ដាក់ពន្ធនាគារ​បណ្តោះអាសន្ន។ បន្ទាប់ពី​លោក ខា ដែន​ណា ព្រះរាជអាជ្ញារង​និង​ជា​អ្នកនាំពាក្យ​អយ្យការ​អម​សាលាដំបូង​ខេត្តកណ្តាល បានសម្រេច​ធ្វើការ​ចោទប្រកាន់​ពីបទ “​ឃាតកម្ម​គិតទុក​ជាមុន​” តាម​មាត្រា​២០០ នៃ​ក្រមព្រហ្មទណ្ឌ ។ បទល្មើស​នេះ​ត្រូវ​ផ្តន្ទាទោស​ដាក់ពន្ធនាគារ​អស់​មួយជីវិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជន​ត្រូវ​ចោទ​ទី​១​ឈ្មោះ​សាំង ធីតា អាយុ​៣៤​ឆ្នាំ ជនជាតិខ្មែរ និង​ទី​២​ឈ្មោះ វី ភេទ​ប្រុស អាយុ​ប្រហែល​ជិត​៤០​ឆ្នាំ ជនជាតិខ្មែរ មុខរបរ​ជាងសំណង​។

​លោក​ឧ​ត្ត​ម​សេនី​យ៍ត្រី ឡាក់ ម៉េង​ធី អ្នកនាំពាក្យ​ស្នងការដ្ឋាន​នគរបាល​ខេត្តកណ្តាល និង​ជា​ស្នងការរង​ទទួល​ផែន​ព្រហ្មទណ្ឌ​នៃ​ស្នងការដ្ឋាន​នគរបាល​ខេត្តកណ្តាល បានបញ្ជាក់​ប្រាប់​ពី​មូលហេតុ ដែល​ស្ត្រី​ជា​ប្រពន្ធ ជួល​ឃាតក​សម្លាប់​ប្តី​នោះ ដោយសារ​ខឹង​ប្តី​ដើរ​អត់​ចូល​ផ្ទះ​ពីរ បី​ថ្ងៃ ហើយ​ចូលមក​ផ្ទះ​វិញ​វៃ​ធ្វើបាប​ខ្លួន។ តែ​នេះ​អាចជា​ពាក្យ​ដោះសារ​ប៉ុណ្ណោះ។ ​បើតាម​ខាង​ធនាគារ​បាន​បញ្ជាក់ថា ជនរងគ្រោះ​ជា​ប្តី ជា​មនុស្ស​ស្លូត សុភាពរាបសារ មាន​អ្នក​គោរព​ស្រលាញ់​ច្រើន មិន​ដូច​ការចោទប្រកាន់​រប​ស់​ប្រពន្ធ​ឡើយ។

សូមបញ្ជាក់ថា នៅ​ថ្ងៃទី​១៤ ខែមករា ឆ្នាំ​២០២៣ មាន​ករណី​ប្រទះឃើញ​សាកសព​អណ្តែត​នៅក្នុង​ប្រឡាយទឹក នៅ​ចំណុច​ភូមិ​ព្រែក​ដូង ឃុំកំពង់ស្វាយ ស្រុក​កៀនស្វាយ ខេត្តកណ្តាល ដែល​សាកសព​ស្គាល់​អត្តសញ្ញាណ​ឈ្មោះ ខឹម ផល្លី ភេទ​ប្រុស អាយុ​៣៣​ឆ្នាំ ជនជាតិខ្មែរ មុខរបរ​មន្ត្រី​ធនាគារ CO ស្រុក​កំ​ណើត​ភូមិ​ថ្លុក​ដ​ង្កា ឃុំ​ផ្ទះ​រុង ស្រុក​ភ្នំ​ក្រវ៉ា​ញ ខេត្តពោធិ៍សាត់ មាន​ទីលំនៅ​បច្ចុប្បន្ន សង្កាត់​ចាក់​អង្រែ​ក្រោម ខណ្ឌមានជ័យ រាជធានី​ភ្នំពេញ ត្រូវ​បាន​ប្រពន្ធ​ជួល​ឃាតក​ក្នុង​តម្លៃ​១០០០​ដុល្លារ ដើម្បី​សម្លាប់​ប្តី។

សភាព​រឿងហេតុ​នៅ​ថ្ងៃកើត​ហេតុ​ខាងលើ មាន​ប្រជាពលរដ្ឋ​ល្អ​បាន​ប្រទះឃើញ​សព​អណ្ដែត​ទឹក​មួយ​នៅក្នុង​ប្រឡាយទឹក​វិ​រះ​ប្រាំ​ដែលមាន​ទទឹង​០៦​ម៉ែត្រ ជម្រៅ​ប្រហែល​២.៣០​ម៉ែត ចំងាយ​ពី​ផ្លូវ​ល្បឿន​លឿន​ប្រហែល​១០០០​ម៉ែត្រ ក្នុងភូមិ​ព្រែក​ដូង ឃុំ​កំពង់ស្វាយ ស្រុក​កៀនស្វាយ ខេត្តកណ្តាល ហើយ​គាត់​ក៏បាន​រាយការណ៍​មក​សមត្ថកិច្ច​ប៉ុស្តិ៍នគរបាល​រដ្ឋបាល​កំ​ពង់​ស្វាយ ភ្លាមនោះ កម្លាំង​ប៉ុស្តិ៍​បាន​រាយការណ៍​មក​ជំនាញ​ពិនិត្យ និង​វិភាគ​កន្លែង​កើតហេតុ​ស្រុក​និង​អាជ្ញាធរ​ភូមិ​ឃុំ គ្រូពេទ្យ​ដើម្បី​ចុះ​មក​ពិនិត្យ​សាកសព​អណ្តើ​ត​ទឹក​នោះ​។ ការពិនិត្យ​សាកសព​ឃើញ​ថា​សាកសព​ស្លាប់​ដោយសារ​រឹត​ក និង​ឆក់។

ផ្អែក​តាម​ច​ម្លើយ​ប្រពន្ធ​ជនរងគ្រោះ​ឈ្មោះ សាំង ធីតា អាយុ​៣៤​ឆ្នាំ ជនជាតិខ្មែរ បាន​សារភាពថា ខ្លួន និង​ឈ្មោះ វី ភេទ​ប្រុស អាយុ​ប្រហែល​ជិត​៤០​ឆ្នាំ ជនជាតិខ្មែរ មុខរបរ​ជាង​សំណង ជា​អ្នក​សម្លាប់​ប្តី​របស់ខ្លួន ដោយ​ធ្វើ​ការ​ឆក់ និង​រឹត​ក​សម្លាប់​។

ដោយ​អនុវត្តតាម​បទបញ្ជា​របស់​នាយ​ឧ​ត្ត​ម​សេនីយ៍ សន្ដិ​បណ្ឌិត នេ​ត សាវឿន អគ្គស្នងការ​នគរបាល​ជាតិ​, លោក​ឧ​ត្ត​ម​សេនីយ៍​ឯក ង៉េ​ង ជួ ប្រធាន​នាយកដ្ឋាន​នគរបាល​ព្រហ្មទណ្ឌ បាន​បញ្ជា​ឲ្យ​លោក​ឧ​ត្ត​ម​សេនីយ៍​ត្រី ខេង ម៉េង​ឈាង អនុប្រធាននាយកដ្ឋាន ដឹកនាំ​កម្លាំង​ជំនាញ សហការ​ជាមួយ​ស្នងការដ្ឋាន​នគរបាល​ខេត្តកណ្ដាល ដឹកនាំ​ដោយ​លោក​ឧ​ត្ត​ម​សេនី​យ៍​ត្រី ឡាក់ ម៉េង​ធី ស្នងការរង​ទទួល​ផែន​ព្រហ្មទណ្ឌ​ខេត្ត​កណ្តាល ដើម្បី​ស្រាវជ្រាវ​ចាប់ខ្លួន​ជនដៃដល់។

រហូតដល់​វេលា​ថ្ងៃត្រង់ ថ្ងៃទី​១៥ ខែមករា ឆ្នាំ​២០២៣​នេះ កម្លាំង​នាយកដ្ឋាន​នគរបាល​ព្រហ្មទណ្ឌ បាន​ចាប់ខ្លួន​ជនដៃដល់​ឈ្មោះ វី ដែល​ស៊ីឈ្នួល​សម្លាប់​ជនរងគ្រោះ ក្នុងតម្លៃ​១០០០​ដុល្លារ ពី​ប្រពន្ធ​ជនរងគ្រោះ​៕

ដោយ ៖ ឆៃ យ៉ា

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម