​អភិបាលក្រុងដូនកែវ​ណែនាំឱ្យនាយក​សាលាតាមដានសិស្ស​លុបបំបាត់ក្មេងទំនើង​

អភិបាលនៃគណៈអភិបាលក្រុងដូនកែវ ​លោក កង អាណាន់ បានធ្វើការណែនាំទៅដល់​លោក​នាយកសាលា និងលោកគ្រូ អ្នកគ្រូទាំងអស់ក្នុងក្រុង ត្រូវតាមដានសង្កេតមើល​គ្រប់សិស្សា​នុសិស្ស​ទាំងអស់នូវទង្វើ និងសកម្មភាពរបស់ពួកគេ ដើម្បីចូលរួមលុបបំបាត់ឱ្យបានជាដាច់ខាតនូវក្មេង​ទំនើងនៅតាមសាលារៀនរដ្ឋ និងឯកជន។​

លោកអភិបាលក្រុងដូនកែវលើកឡើងអំឡុងពេលចុះសួរសុខទុក្ខ​សិស្សានុសិស្សនៅវិទ្យាល័យ ជា ស៊ីម តាកែវ នៅព្រឹកថ្ងៃទី ២០ ខែកុម្ភៈ ឆ្នាំ ២០២៣ ស្ថិតក្នុងសង្កាត់រការក្នុង ក្រុងដូនកែវ ខេត្តតាកែវ។

លោក អភិបាលក្រុងដូនកែវណែនាំឱ្យផ្ដើមអនុវត្តមុនគេពីសាលារៀនជា ស៊ីម តាកែវនេះ ហើយជាបន្តបន្ទាប់ទៀត នៅទូទាំងក្រុងដូនកែវតែម្តង។

ជាមួយគ្នានោះផងដែរ លោកអភិបាលក៏បានជំរុញលើកទឹកដល់ប្អូនៗសិស្សានុសិស្សទាំងអស់ត្រូវបន្តយកចិត្តទុកដាក់សិក្សារៀនសូត្រឲ្យបានពូកែស្តាប់ការណែនាំរបស់គ្រូ ធ្វើជាសិស្សល្អ កូនល្អរបស់ឪពុកម្តាយ និងធ្វើជាទំពាំងស្នងឬស្សី សម្រាប់ប្រទេសជាតិនៅថ្ងៃអនាគត់ផងដែរ។

ក្នុងឱកាសនោះ លោក កង អាណាន់ ក៏បានជំរុញទៅដល់ប្អូនៗ​ដែលគ្រប់អាយុ​ធ្វើអត្តសញ្ញាណប័ណ្ណ និងមិនទាន់មាន សូមរួតរះទៅធ្វើឲ្យបានគ្រប់ៗគ្នា៕

អត្ថបទ៖ វីរៈ