ប៉ូលិស​ថៃ រកឃើញ​ហេរ៉ូអុីនជិត ១០ គីឡូក្រាម លាក់​បង្កប់​នៅក្នុងកំប៉ុងផ្លែឈើ

ហេរ៉ូអុីន ប្រមាណជិត១០ គីឡូក្រាម ដែលជនទុច្ចរិតបានដាក់បង្កប់នៅក្នុងកំប៉ុងផ្លែឈើ ហើយបម្រុងផ្ញើរចេញទៅក្រៅប្រទេស ត្រូវបានកម្លាំងប្រឆាំងគ្រឿងញៀនចាប់បាន នៅក្នុងក្រុមហ៊ុនទទួលបញ្ញើរឯកជនមួយកន្លែងនៅក្នុងប្រទេសថៃ។

យោងតាមការផ្សាយរបស់គេហទំព័រ PBS បានបញ្ជាក់ថា កិច្ចប្រតិបត្តិការដ៏សម្ងាត់នេះបានធ្វើឡើងកាលពីរសៀលថ្ងៃទី ៣ ខែមីនា ឆ្នាំ២០២៣ នៅក្នុងទីតាំងក្រុមហ៊ុនទទួលបញ្ញើរឯកជនមួយនៅក្នុងប្រទេសថៃ។

គេហទំព័របានបន្តថា នៅក្នុងកិច្ចប្រតិបត្តិការឆែកឆេរទំនិញចំនួន ១១ កេស សមត្ថកិច្ចបានបើកកេស​និងកំប៉ុងផ្លែឈើនៅចំពោះមុខម្ចាស់ក្រុមហ៊ុនតែម្តងដើម្បីពិនិត្យជាក់ស្តែង ដោយម្ចាស់បញ្ញើរដែលមានស្ត្រីថៃមួយរូបនិងជនជាតិស្បែកខ្មៅ ២ រូប (ជនជាតិនីហ្សេរីយ៉ា) ដែលទំនិញផ្លែឈើកំប៉ុងទាំង១១ កេស​នេះ ត្រៀមផ្ញើរទៅកាន់ហុងកុង។

លទ្ធផលនៃការបើកកំប៉ុងផ្លែឈើ គឺមានបង្កប់ហេរ៉ូអុីននៅគ្រប់កំប៉ុងទាំងអស់ ដែលសរុបមានទម្ងន់ ៨,៥០ គីឡូក្រាម ត្រូវបានសមត្ថកិច្ចរឹបអូស និងឃាត់ខ្លួនមនុស្ស ៣ នាក់ ព្រមទាំងរថយន្ត២គ្រឿង។ នៅក្នុងនោះដែរសមត្ថកិច្ចកំពុងស៊ើបអង្គេតទៅលើស្ត្រីដែលជាជនជាតិថៃ ប្រសិនបើគ្រាន់តែពាក់ព័ន្ធការខ្ចីអត្តសញ្ញាណប័ណ្ណដើម្បីផ្ញើរទំនិញទេនោះ គឺអាចប្រឈមនឹងការជាប់ពន្ធនាគារមិនលើសពី៣ឆ្នាំ និងត្រូវពិន័យជាប្រាក់ ៦ មុឺនបាត។ នេះបើយោងតាមច្បាប់ប្រឆាំងគ្រឿងញៀន៕

អត្ថបទ÷ សោ និយមរ័ត្ន