ជនដៃជាប់ពាក់ព័ន្ធករណីឃាតកម្មសម្លាប់បង​ប្រុង​បង្កើតកាលពីថ្ងៃទី១៤ ខែមីនា ឆ្នាំ២០២៣ នៅចំណុចក្រុមទី ០១ ភូមិស្វាយជួរ ឃុំអណ្តេីកហែប ស្រុក​រតនមណ្ឌល ខេត្តបាត់ដំបង ត្រូវបានសមត្ថកិច្ចឃាត់ខ្លួនបានហើយ។

ជនដៃដល់ឈ្មោះ យ៉ុន សំអូន​ ភេទប្រុសអាយុ ១៩ ឆ្នាំ ជាប្អូនបង្កេីតរបស់ជនរងគ្រោះបានធ្វេីសកម្មភាពយកកូនកាំបិត​ចិត​បន្លែចាក់ទៅលេីជនរងគ្រោះឈ្មោះ យ៉ុន យៀត ភេទប្រុស អាយុ ២៤ឆ្នាំ បណ្តាលឲ្យរងគ្រោះធ្ងន់ធ្ងររហូតបានបាត់បង់ជីវិត។ ក្រោយ​កើតហេតុ​ ជនសង័្សយបានរត់គេចខ្លួនបាត់នៅពេលនោះតែម្តង។ 

យ៉ាងណាមិញ សមត្ថកិច្ចបាន​​ធ្វេី​ការស្រាវជ្រាវរហូតឈានទៅឃាត់ខ្លួនជនសង្ស័យ និងធ្វេីការសាកសួរជុំវិញមូលហេតុនៃករណីឃាតកម្មនេះ។

តាមចម្លេីយបឋមរបស់​ជនសង័្សយ មូលហេតុដែលខ្លួនប្រព្រឹ​ត្តិបែបនេះគឺដោយសារខ្លួនមានទំនាស់ពាក្យសម្តី​ជាមួយគ្នាបន្តិច​បន្តួច​ ក៏ផ្តេីមទៅដល់ការប្រេីហិង្សាដោយយកកូនកាំបិតចាក់ទៅលើជនរងគ្រោះដែលជាបងបង្កើតតែម្តង។

លោក សន និល អធិការដ្ឋាននគរ​បា​លស្រុក រតនមណ្ឌល​ បានឲ្យដឹងដែរថា ការឃាត់ខ្លួនជនដៃដល់ធ្វើឡើងតាមរយះកម្លាំងអធិការរួមសហការជាមួយកម្លាំងការិយាល័យនគរបាលព្រហ្មទ័ណ្ឌកម្រិតស្រាលនៃស្នងការខេត្តដែលមានលោកវរសេនីយ៍ឯក​ ឈឿង​ គឹមសុង​ ជានា​យការិយាល័យបានធ្វេីការបង្រ្កាបករណីឃា​តកម្មមួយករណីឃាត់​ខ្លួនមុខស​ញ្ញាចំនួន០១នាក់ឈ្មោះ​ យ៉ុ​ន សំអូន​ ភេទប្រុស​ អាយុ​ ១៩ឆ្នាំនាំយកមកធ្វេីការសាកសួរស្រាវ​ជ្រាវ។

នៅពេលនេះសមត្ថកិច្ចកំពុងសាកសួរកសាង សំណុំរឿងបញ្ជូនមកផែនជំនាញអនុវត្តបន្តតាមនីតិវិធី​៕

អត្ថបទ៖ សៅ សារិទ្ធ