ឃាត់ខ្លួនប៉ូលិសសេដ្ឋកិច្ចម្នាក់នៅច្រកព្រំដែនភ្នំដិនក្រោយផ្ទុះអាវុធជាមួយគយចល័ត

ប៉ូលិសសេដ្ឋកិច្ចម្នាក់ប្រចាំការនៅច្រកទ្វារអន្តរជាតិភ្នំដិន ស្រុកគីរីវង់ ខេត្តតាកែវ ត្រូវបានកម្លាំងចម្រុះឃាត់ខ្លួនយកមកស្នងការដ្ឋាននគរបាលខេត្ត ដើម្បីសួរនាំក្រោយបង្ករការផ្ទុះអាវុធជាមួយគយចល័តនៅយប់ថ្ងៃទី ០១ ខែកក្កដា ឆ្នាំ២០២៣ នៅក្បែរច្រកទ្វារអន្តរជាតិភ្នំដិន។

ប្រភពព័ត៌មានពីសាក្សីនៅកន្លែងកើតហេតុបានឲ្យដឹងថា មុនមានការផ្ទុះអាវុធ ទំនងមានការកាច់កុងគ្នារវាងគយចល័ត និងប៉ូលិសសេដ្ឋកិច្ចប្រចាំការនៅច្រកព្រំដែន ព្រោះឃើញមានរថយន្តដឹកទំនិញសំពីងសំពោងជាច្រើនគ្រឿងនៅទីនោះ។

ប្រភពដដែលបង្ហើបថា ទំនងខាងប៉ូលិសសេដ្ឋកិច្ចរកស៊ីកាងរថយន្តដឹកទំនិញ ហើយមិនព្រមបង់ពន្ធទៅគយចល័ត ទើបបានជាកើតមានជម្លោះ រហូតមានការផ្ទុះអាវុធទៅលើគយចល័តបែបនេះទៅ។

បច្ចុប្បន្នមានរថយន្តដឹកទំនិញ ០៦ គ្រឿងត្រូវបានយកមករក្សាទុកនៅស្នាក់ការគយ និងរដ្ឋករខេត្តកែវ ដើម្បីដោះស្រាយ។

ជុំវិញករណីខាងលើ លោក ស៊ុន ឆាយ ប្រធានសាខាគយ និងរដ្ឋករខេត្តតាកែវ បានប្រាប់ឱ្យដឹងនៅព្រឹកថ្ងៃទី០៣ ខែកក្កដាថា ការងារនោះគឺបានធ្វើអនុលោមភាពហើយ ម្យ៉ាងប៉ូលិសសេដ្ឋកិច្ចប្រចាំការនៅច្រកនេះ បានផ្ទុះអាវុធ​មកលើគយ ព្រោះគាត់ជាអ្នកកាងរថយន្តដឹកទំនិញពេលយប់។

ចំណែកលោកឧត្តមសេនីយ៍ត្រី ហ៊ិន សុខេន ស្នងការរងទទួលផែនព្រហ្មទណ្ឌនៃស្នងការដ្ឋាននគរបាលខេត្តតាកែវ បានឲ្យដឹងថា ករណីនេះ ជំនាញលោកកំពុងដោះស្រាយ និងមានវិធានការតាមនីតិវិធី៕

អត្ថបទ៖ វីរៈ