អគ្គិភ័យឆេះផ្ទះតារាចម្រៀងលោក ណូយ វ៉ាន់ណេត ខូចខាតសម្ភារៈមួយចំនួន

ផ្ទះតារាចម្រៀងលោក ណូយ វ៉ាន់ណេត ដែលស្ថិតនៅសង្កាត់ព្រែកថ្មី ខណ្ឌច្បារអំពៅ ត្រូវបានអគ្គិភ័យឆាបឆេះកាលពីវេលាម៉ោង២រសៀលថ្ងៃទី១៤ ខែកញ្ញា ឆ្នាំ២០២៣នេះ បណ្ដាលឲ្យខូចខាតសម្ភារៈមួយចំនួន។ តែទោះយ៉ាងណា ករណីនេះត្រូវបានកម្លាំងសមត្ថកិច្ចជំនាញបង្ការពន្លត់អគ្គិភ័យនិងសង្គ្រោះនៃស្នងការដ្ឋាននគរបាលរាជធានីភ្នំពេញ ជួយអន្តរាគមន៍ទាន់ពេលវេលា។

តារាចម្រៀងលោកគ្រូ ណូយ វ៉ានណេត បានប្រាប់«កម្ពុជាថ្មី»តាមទូរស័ព្ទនៅរសៀលនេះថា ផ្ទះដែលត្រូវអគ្គិភ័យឆេះមុននេះ គឺជាផ្ទះរបស់លោកតែម្តង។ ចំពោះមូលហេតុត្រូវបានលោក ណូយ វ៉ាន់ណេត បញ្ជាក់ថា បណ្តាលមកពីឆ្លងចរន្ដអគ្គិសនី ដែលបណ្តាលឆាបឆេះរបស់របរនៅក្នុងផ្ទះអស់មួយចំនួន ប៉ុន្តែសំណាងល្អបានសមត្ថកិច្ចចុះជួយអន្តរាគមទាន់ពេល។

ដោយឡែកពាក់ព័ន្ធនឹងសម្ភារ:ដែលត្រូវខូចខាតនៅក្នុងផ្ទះមានអ្វីខ្លះនោះ មិនត្រូវបានលោក ណូយ វ៉ាន់ណេត ដឹងនៅឡើយទេ ព្រោះពេលនេះលោកកំពុងបំពេញការងារនៅតាមខេត្ត៕

អត្ថបទ៖ ចាន់រ៉ា