លួចលុយក្រុមហ៊ុន​ជាង ១ ៣០០ ០០០ បាត​ ចូល​កាសុីណូ​លេងល្បែងចាញ់អស់ ត្រូវអាវុធហត្ថឃាត់ខ្លួន

នៅថ្ងៃទី ១៥​ ខែកញ្ញា​ ឆ្នាំ២០២៣​ ស្រ្តីជាជនជាតិថៃម្នាក់បានចូលលួចលុយក្នុងកុងរបស់ក្រុមហ៊ុនខារ៉ាអូខេ ១ កន្លែង បាន​​លុយចំនួន ១,៣០០,០០០បាត ចូលកាសុីណូលេងល្បែងចាញ់អស់ នៅចំណុចភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។

ក្រោយពីបាត់លុយអស់ច្រើន ម្ចាស់ក្រុមហ៊ុន ឈ្មោះ ម៉ឹង សុខហេង ភេទស្រី អាយុ ៣៦ ឆ្នាំ មានទីលំនៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បាន​ដាក់ពាក្យបណ្តឹងដល់កំលាំងអាវុធហត្ថក្រុងប៉ោយប៉ែត។

ក្រោយពីបានទទួលពាក្យ​បណ្តឹង លោក​វរសេនីយ៍ត្រី​ នួន​ នីណារ៉ូ​ មេបញ្ជាការមូលដ្ឋានកងរាជអាវុធហត្ថក្រុង​បានដឹកនាំកំលាំងអាវុធហត្ថប៉ោយប៉ែត ១ ក្រុមចុះធ្វើការស្រាវជ្រាវឈានដល់ឃាត់ខ្លួនស្ត្រីជនជាតិថៃម្នាក់មានឈ្មោះ សារ៉ាបាន់ អុធុមផន ហៅមុត ភេទស្រី អាយុ ២៦ ឆ្នាំ ជនជាតិថៃ ស្នាក់នៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ នៅថ្ងៃទី ១៦ ខែកញ្ញា ឆ្នាំ ២០២៣ បញ្ជូនមកអាវុធហត្ថក្រុងដើម្បីសាកសួរបន្ត។

លោក វរសេនីយ៍ត្រី​ នួន​ នីណារ៉ូ​ បានបញ្ជាក់ថា ក្រោយពីទទួលបានដីកាសម្រេចឲ្យបើកការស៊ើបអង្កេតបឋមរួច កម្លាំងជំនាញមូលដ្ឋានកងរាជអាវុធហត្ថក្រុងប៉ោយប៉ែត បានចាត់ការតាមនីតិវិធីដោយបានធ្វើការកោះហៅឈ្មោះ សារ៉ាបាន់ អុធុមផន ហៅមុត ឲ្យចូលខ្លួនមកបំភ្លឺ ក្នុងនោះជនសង្ស័យបានសារភាពថាខ្លួនពិតជាបានលួចប្រាក់របស់ក្រុមហ៊ុន​ (ខារ៉ាអូខេ) របស់ជនរងគ្រោះជាបន្តបន្ទាប់ សរុបចំនួន ១,៣០០,០០០បាត​ ហើយប្រាក់ដែលលួចបាន គឺបាន​យកទៅលេងល្បែងរហូតចាញ់អស់ពីខ្លួន។

បន្ទាប់មកកម្លាំងមូលដ្ឋានកងរាជអាវុធហត្ថក្រុងប៉ោយប៉ែត បានធ្វើការឃាត់ខ្លួន​តែម្តង និងបានកសាងសំណុំរឿងបញ្ជូនមកកាន់បញ្ជាការដ្ឋានកងរាជអាវុធហត្ថ​ខេត្ត​ចាត់ការបន្តតាមនីតិវិធី​។

លោកវរសេនីយ៍ឯក ម៉ែន​ ភិរម្យ មេបញ្ជាការរងកងរាជអាវុធហត្ថខេត្ត ទទួលការងារស្រាវជ្រាវ​ និងបង្ក្រាបបទល្មេីស​បានឲ្យដឹងថា​ ការបង្ក្រាបករណីខាងលើនេះ ក្រោយពីទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពី ឯកឧត្តម កើត វណ្ណារ៉េត ព្រះរាជអាជ្ញា អមសាលាដំបូងខេត្តផងដែរ ជនសង្ស័យ​ ត្រូវបានកម្លាំងការិយាល័យព្រហ្មទណ្ឌ ​កងរាជអាវុធហត្ថខេត្ត បញ្ជូនទៅសាលាដំបូងខេត្ត​ហើយ នៅព្រឹកថ្ងៃអាទិត្យ ទី១៧ ខែកញ្ញា​​​​ ឆ្នាំ​២០២៣​នេះ​ ដើម្បីអនុវត្តតាមនីតិវិធី​ច្បាប់៕

អត្ថបទ៖ វ៉ាន់ ណាង