មន្ត្រីខណ្ឌមានជ័យចុះប្រមូលក្រុមមនុស្ស ២៣ នាក់ដេកតាមទីសាធារណៈ

មនុស្សចំនួន២៣នាក់ដែលដេកតាមទីសាធារណៈគ្មានគោលដៅពិតប្រាកដត្រូវបានឃាត់ខ្លួនយកទៅមន្ទីរសង្គមកិច្ចរាជធានីភ្នំពេញព្រោះក្រុមនេះច្រើនបង្កអសន្តិសុខក្នុងមូលដ្ឋាន។

យោងតាមប្រភពពីលោក ឡុង ង៉ែត អភិបាលរងខណ្ឌមានជ័យបានឲ្យកម្ពុជាថ្មីថា យុទ្ធនាការចាប់ប្រមូលក្រុមមនុស្សសមាសភាពមិនល្អនេះគឺធ្វើឡើងនៅវេលាថ្ងៃត្រង់ថ្ងៃទី ១៨ ខែកញ្ញា នៅក្រោយអតីតឡឥដ្ឋផ្លូវ ៦០ ម៉ែត្រ និងក្នុងបរិវេណវត្តចាក់អង្រែលើស្ថិតក្នុងមូលដ្ឋានសង្កាត់ចាក់អង្រែ ខណ្ឌមានជ័យ រាជធានីភ្នំពេញ។

លោក ឡុង ង៉ែត បានបន្តថា ក្នុងយុទ្ធនាការនេះដឹកនាំដោយលោក ហែម ដារិទ្ធ អភិបាលខណ្ឌមានជ័យ និងលោក កែវ សាវឿន ចៅសង្កាត់ចាក់អង្រែលើ។ ចំពោះមនុស្សទាំង ២៣ នាក់នេះគឺសុទ្ធសឹងបង្កភាពអសន្តិសុខក្នុងមូលដ្ឋានប៉ះពាល់ដល់ការរស់នៅរបស់ប្រជាពលរដ្ឋទៀតផង។

តាងនាមឲ្យប្រជាពលរដ្ឋរស់នៅក្នុងសង្កាត់ចាក់អង្រែលើ លោក កែវ សាវឿន ជាចៅសង្កាត់សូមថ្លែងអំណរគុណដល់លោកអភិបាលខណ្ឌមានជ័យព្រមទាំងលោកអភិបាលរងខណ្ឌដែលដឹកនាំកម្លាំងចុះប្រមូលក្រុមមនុស្សសមាសភាពមិនល្អយកទៅអប់រំឲ្យក្លាយទៅជាមនុស្សល្អ និងចេញពីមន្ទីរអប់រំគួរចូលផ្ទះសម្បែងជួបជុំគ្រួសារវិញទើបល្អ៕

អត្ថបទ៖ នរា