បញ្ជូនខ្លួនជនជាតិវៀតណាម ៤ នាក់ខួងយករ៉ែគ្មានច្បាប់អនុញ្ញាតទៅតុលាការ

កម្លាំងអាវុធហត្ថខេត្តស្ទឹងត្រែងក្រោមការបញ្ជាផ្ទាល់ពីឧត្តមសេនីយ៍ត្រី អៀង វ៉ាន់ឌី មេបញ្ជាការកងរាជអាវុធហត្ថខេត្តស្ទឹងត្រែង និងមានការសម្របសម្រួលពីព្រះរាជអាជ្ញាអមសាលាដំបូងខេត្តស្ទឹងត្រែង បានចុះឃាត់ខ្លួនជនជាតិ​វៀតណាមចំនួន ៤ នាក់ពាក់ព័ន្ធក្នុងករណីខួងយករ៉ែដោយគ្មានច្បាប់អនុញ្ញាត និងបានបញ្ជូនខ្លួនទៅកាន់តុលាការនារសៀលថ្ងៃទី ៧ ខែមករាឆ្នាំ ២០២៣នេះ។

ជនសង្ស័យជាជនជាតិវៀតណាមចំនួន ៤ នាក់ត្រូវបានកម្លាំងអាវុធហត្ថឃាត់ខ្លួនកាលពីថ្ងៃទី០៥ ខែមករា ឆ្នាំ២០២៤​ចំណុច​ភ្នំដាច់ ស្ថិតនៅក្នុងភូមិផ្អាវ ឃុំអន្លង់ភេ ស្រុកថាឡាបរិវ៉ាត់ ខេត្តស្ទឹងត្រែង។

លោកឧត្ដមសេនីយ៍ត្រី អៀង វ៉ាន់ឌី មេបញ្ជាការកងរាជអាវុធហត្ថខេត្តស្ទឹងត្រែងបានដឹងថា ដោយមានការដឹកនាំសម្រប សម្រួលនីតិវិធីដោយលោក នៅ យូណារិទ្ធ ព្រះរាជអាជ្ញារងនៃអយ្យការអមសាលាដំបូងខេត្តស្ទឹងត្រែង ព្រមទាំងមានការចូលរួមពីអាជ្ញាធរមូលដ្ឋាន (មេភូមិ) ចុះបង្ក្រាបករណីការធ្វើប្រតិបត្តិការខួងយករ៉ែដោយគ្មានអាជ្ញាបណ្ណធនធានរ៉ែ ចំនួន ២ ទីតាំងនៅចំណុចខាងលើ។

លោកមេបញ្ជាការអាវុធហត្ថបានបញ្ជាក់បន្ថែមថា ក្នុងប្រតិបត្តិការបានឃាត់ខ្លួនជនសង្ស័យជាជនវៀតជាតិវៀតណាមចំនួន ៤នាក់ មាន ១-ឈ្មោះTRAN TRONGTANG ភេទប្រុស អាយុ ៤៦ ឆ្នាំ មុខរបរជំនាញសិក្សាដីរុករករ៉ែ មានទីលំនៅក្រុងហាណូយ ប្រទេសវៀតណាម។ ២-ឈ្មោះចឹង ថាយយឿង ភេទប្រុស អាយុ ២៧ ឆ្នាំ ជំនាញសិក្សាដីរុករករ៉ែ មានទីលំនៅទីក្រុងហាណូយ ប្រទេសវៀតណាម។ ៣-ឈ្មោះងៀន អុងនឿង ភេទប្រុស អាយុ ២៨ ឆ្នាំ បុគ្គលិកសិក្សាដីរករ៉ែ មានទីលំនៅក្រុងហាយណូយប្រទេសវៀតណាម និង ៤-ឡេ វ៉ាន់ទុន ភេទប្រុស អាយុ ៤២ ឆ្នាំ មុខរបរធ្វើចម្ការ មានទីលំនៅភូមិត្នោតម្លូ ឃុំត្នោតម្លូ ស្រុករវៀង ខេត្តព្រះវិហារ។

ក្នុងការបង្ក្រាបបានដកហូតវត្ថុតាងរួមមានរថយន្ត ១ គ្រឿងម៉ាក FORD RAVGER ពណ៌ខ្មៅ ពាក់ស្លាក​លេខភ្នំពេញ 2BB-1383 ដែលជនសង្ស័យបើករត់គេចចេញពីកន្លែងកើតហេតុ និង​វត្ថុតាងនៅកន្លែងកើតហេតុរួមមាន÷ ម៉ាស៊ីខួងរ៉ែ ២ គ្រឿង, ម៉ាស៊ីនគោយន្ត ២ គ្រឿង, ទុយោជ័រ ៤, ហ្វុយដាក់ទឹក ៤ ,ដែកបំពង់ទីប ៤៦ ដើម, ដែកបំពុងទីបធ្វើជើងជ្រែងទប់ម៉ាស៊ីន ១២ កំណាត់។

ឆែកឆេរនិងចាប់វត្ថុតាងក្នុងរថយន្តរបស់ជនសង្ស័យរួមមាន÷ ឧបករណ៍ស្រូបរុករករ៉ែចំនួន ០៣ គ្រឿង,ថ្ម ដីច្រកក្នុងថង់ប្លាស្ទិក ដែកឆក់ សម្រាប់យកទៅពិសោធន៍មួយចំនួន។

ករណីនេះសមត្ថកិច្ចបានធ្វើការត្រួតពិនិត្យ និងសាកសួរជនសង្ស័យជនជាតិវៀតណាមទាំង០៤នាក់ខាងលើពុំមានឯកសារបទដ្ឋានគតិយុត្តិណាមួយអនុញ្ញាតឱ្យខួងរុករកធនធានរ៉ែពីស្ថាប័នជំនាញឡើយ។

បច្ចុប្បន្នជនសង្ស័យព្រមជាមួយវត្ថុតាង ត្រូវ​កម្លាំងកងរាជអាវុធហត្ថបញ្ជូនទៅកាន់អយ្យការអមសាលាដំបូងខេត្តស្ទឹងត្រែងដើម្បីចាត់ការតាមនីតិវិធី៕

អត្ថបទ៖ ងិនលីម