សន្តិសុខសង្គម

យុវជនក្មេងទំនើងមួយក្រុម ត្រូវបានមេប៉ុស្តិ៍ ឃុំអង្កោល ហៅមកសួរនាំធ្វើកិច្ចសន្យា ក្រោយបង្ហាញសកម្មភាពទំនើងតាមបណ្តាញសង្គម

បានផុស

២ years មុន

នៅ

ថ្ងៃពុធ ២៤ មេសា ២០២៤

ដោយ

កែប ៖ បើគិតត្រឹមរសៀលថ្ងៃទី២៤ ខែមេសា ឆ្នាំ២០២៤នេះ លោក អ៊ូ វក មេប៉ុស្តិ៍នគរបាលឃុំអង្កោល បានយុវជនវ័យជំទង់មួយក្រុមដែលមានគ្នា ៥នាក់ រស់នៅភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប ត្រូវបានប៉ុស្តិ៍នគរបាលរដ្ឋបាលឃុំអង្កោល ហៅមកសាកសួរ និងធ្វើកិច្ចសន្យានូវចំពោះមុខសមត្ថកិច្ច ក្រោយពីបង្ហាញសកម្មភាពបែបទំនើងតាមបណ្តាញសង្គម ដែលធ្វើឱ្យប៉ះពាល់ដល់សន្តិសុខ និងសណ្តាប់ធ្នាប់សាធារណៈ ជាពិសេសតំបន់ឆ្នេរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ូ វក មេប៉ុស្តិ៍នគរបាលរដ្ឋបាលឃុំអង្កោល បានប្រាប់ឲ្យដឹងថា ក្រោយបានឃើញបង្ហាញធ្វើសកម្មភាពមិនគប្បីតាមបណ្តាញសង្គមចង់ធ្វើ បងធំបងតូច ពីសំណាក់ក្រុមយុវជនទាំងនោះ ត្រូវបានលោក អ៊ូ វក មេប៉ុស្តិ៍ឃុំអង្កោលចាត់កម្លាំងចុះមកសួរនាំ រហូតហៅទៅធ្វើកិច្ចសន្យាជាបន្តបន្ទាប់ នៅរសៀលថ្ងៃទី២៤នេះ សរុបទៅបានចំនួន ៥នាក់ ក្រោយមានការធានាពីសំណាក់អាណាព្យាបាល លោកបានអនុញ្ញាតឱ្យពួកគេត្រឡប់ទៅផ្ទះវិញហើយដែរ។

លោកបានសំណូមពរទៅដល់ មាតា បិតា ឬអាណាព្យាបាល បន្តខិតខំ អប់រំកូនៗរបស់ខ្លួន ឱ្យដើរផ្លូវល្អ ជៀសចេញឱ្យឆ្ងាយពីការប្រមូលផ្ដុំគ្នាបង្កើតជាក្រុមបងធំបងតូច ដែលឈានទៅប្រព្រឹត្តិអំពើអបាយមុខផ្សេងៗ។

សូមបញ្ជាក់ដែរថា មួយរយៈពេលនេះលេចចេញវត្តមានក្រុមក្មេងទំនើងជាច្រើនក្រុម បានបង្កផលរំខាន ដល់ជីវភាពរស់នៅ របស់ប្រជាពលរដ្ឋរស់នៅក្នុងភូមិអង្កោល ជាពិសេសផ្លូវប្របមាត់សមុទ្រតាមបណ្តោយឆ្នេរអង្កោលពួកគេបានបង្ហោះម៉ូតូ ជាមួយការបំពងសំឡេងរំខាននានា ក្នុងនោះក៏មានសកម្មភាពវាយតប់គ្នាផងដែរ។

ទោះជាយ៉ាងណាកងកម្លាំងប៉ុស្តិ៍នគរបាលរដ្ឋបាលឃុំអង្កោល តែងតែបានចុះអន្តរាគមន៍ភ្លាមៗរាល់ពេលមានអសកម្មភាពទាំងនោះ និងហៅយកទៅអប់រំណែនាំជាបន្តបន្ទាប់ជាញឹកញាប់ផងដែរ៕

ដោយ ៖ សឹង រ៉ាត់