បង្ក្រាបទីតាំងកែច្នៃប្រេងម៉ាស៊ីនក្លែងក្លាយដកហូតប្រេងម៉ាស៊ីនជាង៥តោន

កម្លាំងសមត្ថកិច្ចជំនាញនៃនាយកដ្ឋានប្រឆាំងបទល្មើសសេដ្ឋកិច្ច អគ្គស្នងការដ្ឋាននគរបាលជាតិ បានចុះបង្ក្រាបទីតាំងវេចខ្ចប់ កែច្នៃ និងចែកចាយប្រេងម៉ាស៊ីនក្លែងក្លាយមួយកន្លែង រកឃើញប្រេងម៉ាស៊ីនក្លែងក្លាយជាង៥តោន។

ប្រតិបត្តិការចុះបង្ក្រាបទីតាំងកែច្នៃប្រេងម៉ាស៊ីនក្លែងក្លាយនេះ បានធ្វើឡើងកាលពីថ្ងៃទី៦ ខែមិថុនា ឆ្នាំ២០២៤ នៅចំណុចផ្ទះគ្មានលេខ ផ្លូវបេតុង ភូមិកំពង់សំណាញ់១ សង្កាត់កំពង់សំណាញ់ ក្រុងតាខ្មៅ ក្រោមការសម្របសម្រួលនីតិវិធីពីលោក លី ភារ៉ា ព្រះរាជអាជ្ញារងនៃអយ្យការអមសាលាដំបូងខេត្តកណ្តាល។

ក្នុងប្រតិបត្តិការនោះ សមត្ថកិច្ចបានរកឃើញប្រេងម៉ាស៊ីន និងសម្ភារសម្រាប់វេចខ្ចប់ប្រេងម៉ាស៊ីនក្លែងក្លាយ សរុបប្រមាណជាង ៥តោន និងបានដកហូតសម្ភារទាំងអស់យកទៅរក្សាទុកជាបណ្តោះអាសន្ន នៅនាយកដ្ឋាននគរបាលប្រឆាំងបទល្មើសសេដ្ឋកិច្ច ហើយក៏បានខ្លួនម្ចាស់ទីតាំងយកទៅសាកសួរដើម្បីបន្តនីតិវិធីផងដែរ៕

អត្ថបទ៖ សុខុម