សមត្ថកិច្ចចុះបង្រ្កាបទីតាំងវេចខ្ចប់ប្រេងម៉ាស៊ីន Total ក្លែងក្លាយបានជិត៣០០កេស ស្មើនឹងជាង​១២ តោន

សមត្ថកិច្ចនៃនាយកដ្ឋាននគរបាលប្រឆាំងបទល្មើសសេដ្ឋកិច្ច សហការណ៍ជាមួយកម្លាំងសមត្ថកិច្ចមូលដ្ឋានខណ្ឌឫស្សីកែវ ចុះបង្ក្រាបទីតាំងកែច្នៃ វេចខ្ចប់ ស្តុក ចែកចាយ ប្រេងម៉ាស៊ីនម៉ាក TOTAL និង TRA CHANG ក្លែងក្លាយសរុបជិត៣០០កេស ស្នើជាង១២តោន។

ប្រតិបត្តិការនេះបានធ្វើឡើងនៅរសៀលថ្ងៃទី២៣​ ខែសីហា​ ឆ្នាំ២០២៣ ក្នុងទីតាំងឃ្លាំងមួយកន្លែងនៅផ្លូវលេខ១០០៣ ភូមិឡកំបោរ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។

ក្រោយពីការឆែកឆេរត្រួតពិនិត្យជាក់ស្តែងសមត្ថកិច្ចបានរកឃើញសម្ភារបម្រេីឱ្យការវេចខ្ចប់ប្រេងម៉ាស៊ីនក្លែងក្លាយជាច្រើន ដូចជាសំបកពុយ សំបកធុង សំបកកេស សំបកដប តែមប្រិ៍ ស្ទិគឃ័រ រូមទាំងឧបករណ៍សម្រាប់ច្រកចំនួន២ និងប្រេងម៉ាស៊ីនច្រករួចប្រមាណជិត៣០០កេស ដែលសរុបទាំងអស់ប្រមាណជាង១២តោន។

ក្រោយពិនិត្យរួច សមត្ថកិច្ចបានធ្វើការដកហូតសម្ភារពាក់ព័ន្ធដោយរក្សាទុកនៅក្នុងឃ្លាំងដាក់សម្ភារនៃទីតាំងខាងលើ និងបិទផ្អាកដំណើរការទីតាំងជាបណ្តោះអាសន្ន ដើម្បីធ្វើការពិនិត្យស្រាវជ្រាវបន្ត និងបាននាំខ្លួនម្ចាស់ទីតាំងទៅបំភ្លឺ នៅនាយកដ្ឋាននគរបាលប្រឆាំងបទល្នើសសេដ្ឋកិច្ច ដើម្បីបន្តនីតិវិធី។

សូមបញ្ជាក់ថា ប្រតិបត្តិការនេះបានធ្វើឡើងតាមពាក្យបណ្តឹងរបស់ក្រុមហ៊ុន Tilleke & Gibbins (Cambodia) Ltd. ដែលជាក្រុមហ៊ុនតំណាងឲ្យក្រុមហ៊ុន TotalEnergies និងបន្ទាប់ពីការស៊ើបអង្កេត ស្រាវជ្រាវរបស់សមត្ថកិច្ចអស់រយៈពេលប្រហែល ២ខែមក៕