ស្នងការខេត្តសៀមរាប ដកបញ្ឈរជើងនាយរងប៉ុស្ដិ៍ខ្ទារសណ្តាយ បន្ទាប់ពីប្រើហិង្សាលើពលរដ្ឋ

លោកឧត្តមសេនីយ៍ទោ ហួត សុធ សុ្នងការនៃស្នងការដ្ឋាននគរបាលខេត្តសៀមរាប នៅព្រឹកថ្ងៃទី១៦ ខែមិថុនា ឆ្នាំ២០២៤នេះ បានសម្រេចដកបញ្ឈរជើងលោកអនុសេនីយ៍ទោ វឿន សារ៉ាវុធ នាយរងប៉ុស្តិ៍នគរបាលរដ្ឋបាលខ្ទារសណ្តាយ នៃអធិការដ្ឋាននគរបាលស្រុកបន្ទាយស្រី បន្ទាប់ពីប្រើអំពើហិង្សាលើពលរដ្ឋម្នាក់។

តាមរយៈលិខិតបង្គាប់ការលោកឧត្តមសេនីយ៍ទោ ហួត សុធ សុ្នងការនៃស្នងការដ្ឋាននគរបាលខេត្តសៀមរាប បានឲ្យដឹងថា លោកអនុសេនីយ៍ទោ វឿន សារ៉ាវុធ អត្តលេខៈ ៨៤០១៣ ឋានៈនាយរងប៉ុស្តិ៍នគរបាលរដ្ឋបាលខ្ទារសណ្តាយ នៃអធិការដ្ឋាននគរបាលស្រុកបន្ទាយស្រី ត្រូវបានផ្អាកការងារបណ្តោះអាសន្ន ហើយត្រូវមកបង្ហាញមុខនៅការិយាល័យ បុគ្គលិករៀងរាល់ម៉ោងធ្វើការ។ ក្នុងលិខិតបង្គាប់ការបានបញ្ជាក់ពីមូលហេតុថា ល្មើសនឹងបទវិន័យនគរបាលជាតិកម្ពុជា លេខៈ៨៧៣ ប្រក ។

សូមជម្រាបថា កាលពីពេលថ្មីនេះ មានការចែកចាយវីដេអូពីសកម្មភាពមន្ត្រីនគរបាលមួយរូបបានប្រើអំហិង្សាលើបុរសម្នាក់ដែលទង្វើនេះធ្វើឲ្យប្រជាពលរដ្ឋបញ្ចេញមតិរិះគន់ផងដែរ។

យោងតាមប្រភពពីប្រជាពលរដ្ឋម្នាក់សុំមិនបញ្ចេញអត្តសញ្ញាណបានសរសេរចែកចាយនៅលើបណ្ដាញសង្គមថា ថ្ងៃនេះខ្ញុំបានជួបហេតុការណ៍មួយ ហើយខ្ញុំក៏បានថតទុកផងដែរ ក្នុងហេតុការណ៍នេះ មានបងប្រុសម្នាក់ជិះម៉ូតូធម្មតា ហើយមានប៉ូតូលិសនៅតាមឃុំមិនមានការដាក់ប៉ារ៉ាសផាកអ្វីទេ គាក់សួរនាំហើយបានវាយទៅកាន់បុរស់នោះយ៉ាងពេញទំហឹង ដោយគ្រាន់តែសំឡុតសួរ គាត់ភ័យឆ្លើយរអាក់រអួល។ តាមខ្ញុំជួបនឹងមុខជាក់ស្តែង មានប៉ូលិសពេញសិទ្ធម្នាក់ និងសន្តិសុខភូមិម្នាក់ ហើយមកក្នុងស្ថានភាពមានខ្លិនស្រា មួយទៀតពេលខ្ញុំជិះត្រឡប់មកវិញជិះកាត់តាមប៉ុស្ដិ៍ក៏បានឃើញពូៗប៉ូលិសជុំជើងផឹកវាជាក់ស្តែង។ នៅបន្ទាយស្រី តាមផ្លូវដីឡូឡេងណាវ៉ាត់ត្រា ភូមិ ព្រៃ ស្រុកបន្ទាយ ស្រី ខេត្តសៀមរាប៕

អត្ថបទ៖ សុខុម