នគរបាលជំនាញ អំពាវនាវឲ្យយុវជននៅឲ្យឆ្ងាយ​ពី​គ្រឿងញៀន

គ្រឿងញៀន នៅតែជាបញ្ហាចម្បងដែលធ្វើឲ្យប៉ះពាល់ធ្ងន់ធ្ងរដល់យុវជន ព្រោះពួកគេសុទ្ធតែជាជនស្ថិតក្នុងវ័យងាយរងគ្រោះ និងងាយឆាប់ជឿតាមការអូសទាញរបស់ក្រុមជនខិលខូចដែលជាប់ពាក់ព័ន្ធនឹងគ្រឿងញៀន។

បញ្ហាគ្រឿងញៀននេះដែរ កងកម្លាំងសមត្ថកិច្ច នៅតែបន្តកិច្ចប្រតិបត្តិការរបស់ខ្លួនក្នុងការបង្ក្រាបយ៉ាងខ្លាំងខ្លាជាបន្តបន្ទាប់ ដោយមិនដកដៃនោះឡើយ។ ប៉ុន្តែទន្ទឹមនឹងការបង្ក្រាប សមត្ថកិច្ចក៏បានដាក់ចេញនូវផែនការចុះអប់រំផ្សព្វផ្សាយពីផលប៉ះពាល់នៃគ្រឿងញៀន ដល់ប្រជាពលរដ្ឋតាមភូមិឋាន និងសិស្សានុសិស្សតាមសាលារៀនផងដែរ។

លោកឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន បានអំពាវនាវដល់ក្មួយៗជាយុវជន និងសិស្ស សូមនាំគ្នាជៀសឲ្យឆ្ងាយពីគ្រឿងញៀន ព្រោះគ្រឿងញៀននេះ វានឹងបំផ្លាញរាល់បុគ្គលដែលបានប្រើប្រាស់វា តាមរយៈសារធាតុរបស់វា ដែលបានចូលទៅបំផ្លាញខួរក្បាលមនុស្ស និងសេរីរាង្គកាយទាំងមូលផងដែរ។ បន្ថែមទៀតនោះគ្រឿងញៀន គឺជាអ្វីដែលសង្គមជាតិស្អប់ខ្ពើមបំផុត ដូច្នេះហើយសូមយុវជនចូលនាំគ្នានិយាយថាទេ ចំពោះគ្រឿងញៀន។

គួរបញ្ជាក់ថា ក្នុងរយៈពេលកន្លងមកនេះ នគរបាលកម្ពុជា តែងបានធ្វើការបង្ក្រាបករណីជួញដូរ និងផលិតគ្រឿងញៀនធំៗជាច្រើនករណី ដោយបានឃាត់ខ្លួនក្រុមឧក្រិដ្ឋជនជាច្រើននាក់ និងដកហូតថ្នាំញៀនរាប់សិបតោនជាបន្តបន្ទាប់ដើម្បីអនុវត្តនីតិវិធីច្បាប់។ ហើយកាលពីពេលថ្មីៗនេះ គ្រឿងញៀនជាច្រើនតោន ក៏ត្រូវបានអាជ្ញាធរជាតិប្រយុទ្ធប្រឆាំងគ្រឿងញៀន បានរៀបចំពិធីដុតបំផ្លាញចោលផងដែរ៕

អត្ថបទ៖ សុភា