សមត្ថកិច្ចប្រើពេលជាង២ម៉ោង ក្នុងការជួយ​សង្គ្រោះ​​ស្ត្រីជនជាតិឡាវម្នាក់ព្យាយាមរត់ចេញពីបន្ទប់អគារជាន់ទី៧តាមបង្អួច

ស្ត្រីជនជាតិឡាវម្នាក់ត្រូវប្រជាពលរដ្ឋ និងអ្នកធ្វើដំណើរក្បែរនោះប្រទះឃើញលូនចេញតាមបង្អួចក្នុងបន្ទប់អគារជាន់ទី៧ ហើយចងខ្សែសម្រូតចុះមកលើដំបូលផ្ទះប្រជាពលរដ្ឋ។

បន្ទាប់ពីប្រទះឃើញសកម្មភាពខុសប្រក្រតីភ្លាម ប្រជាពលរដ្ឋបានរាយការណ៍ទៅសមត្ថកិច្ចឱ្យជួយអន្តរាគមន៍បានទាន់ពេលវេលា។ ករណីបង្កការភ្ញាក់ផ្អើលទាំងព្រឹកនេះ បានកើតមានឡើងនៅម៉ោងប្រមាណ៨ព្រឹកថ្ងៃទី៨ ខែកក្កដា ឆ្នាំ២០២៤ ស្ថិតនៅចំណុចជិតរង្វង់មូលត្រីដូហ្វីន ខាងលេចរបងសាលាអនុវិទ្យាល័យសម្តេចឪ ក្នុងភូមិសាស្ត្រភូមិ៣ សង្កាត់លេខ៣ ក្រុង/ខេត្តព្រះសីហនុ។

យោងតាមប្រភពពីសមត្ថកិច្ចបានឱ្យដឹងថា ភ្លាមៗនេះគេមិនទាន់ដឹងថា ស្ត្រីវ័យ៣៣ឆ្នាំរូបនេះ មានបំណងរត់គេចចេញពីបន្ទប់អគារ រឺក៏ប៉ុនប៉ុងលោតសម្លាប់ខ្លួននោះទេ។ សមត្ថកិច្ចបានប្រាប់ថា ស្ត្រីម្នាក់នេះមានឈ្មោះ DOUANGMALA PIK ឆ្នាំកំណើតកើតនៅថ្ងៃ៨ ខែ៣ ឆ្នាំ១៩៩១។ ករណីអន្តរាគមន៍សង្គ្រោះស្ត្រីជនជាតិឡាវនេះ ក្រុមសមត្ថកិច្ចចម្រុះ មានកងរាជអាវុធហត្ថ និងកម្លាំងនគរបាលអធិការក្រុង និងនគរបាលប៉ុស្តិ៍ និងលោកអភិបាលក្រុង បានប្រើពេលប្រមាណ២ម៉ោងទើបជួយនាំយកស្ត្រីរូបនេះចុះមកដល់ដីដោយជោគជ័យ។

សមត្ថកិច្ចបានឱ្យដឹងថា ករណីនេះមិនទាន់ដឹងថា ផ្តើមចេញមពីវិបត្តិផ្លូវចិត្ត រឺក៏មានរឿងហេតុបែបណានោះទេ ពេលនេះសមត្ថកិច្ចជំនាញកំពុងនាំស្ត្រីរូបនេះទៅធ្វើការសាកសួររកមូលហេតុពិតប្រាកដ៕

អត្ថបទ៖ ស៊ុយ ចាន់ធា