ពលរដ្ឋស្នើឲ្យអាជ្ញាធរជួសជុលផ្លូវលេខ៩៥

ប្រជាពលរដ្ឋធើ្វដំណើរ ក៏ដូចជាអ្នករស់នៅបណ្ដោយផ្លូវលេខ៩៥ ចាប់ពីចំណុចផ្លូវលេខ៣៦០ ដល់មហាវិថីម៉ៅសេទុងស ក្នុងសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ បានស្នើដល់អាជ្ញាធរពាក់ព័ន្ធឲ្យជួយជួសជុល ខណៈផ្លូវមួយខ្សែនេះកំពុងខូចខាតជាអន្លើប៉ះពាល់ដល់ការធ្វើដំណើរ។

លោក បញ្ញា អ្នកធ្វើដំណើរតាមផ្លូវលេខ៩៥ បានឱ្យដឹងថា ផ្លូវមួយខ្សែនេះមិនមែនទើបតែខូចនោះទេ គឺខូចជាយូរណាស់មកហើយ ធ្វើឱ្យពលរដ្ឋជួបការលំបាកពេលធ្វើដំណើរ ពិសេសពេលមានភ្លៀងធ្លាក់ម្តងៗ មានទឹកដក់ក្នុងជង្ហុក ធ្វើឲ្យអ្នកដំណើរមើលមិនឃើញជិះធ្លាក់ជង្ហុកដួលម្តងៗ។

តាមការបញ្ជាក់ពីប្រជាពលរដ្ឋរស់នៅតំបន់នោះ ពួកគាត់តែងទិញកម្ទេចថ្មយកមកចាក់ក្នុងជង្ហុកដោយខ្លួនឯង ដើម្បីចាក់បំពេញក្នុងជង្ហុក ហើយពួកគាត់ក៏បានរាយការណ៍ជូនអាជ្ញាធរជាច្រើនលើកមកហើយដែរ។

លោក សុខ សម្បត្តិ អភិបាលនៃគណៈអភិបាលខណ្ឌបឹងកេងកង បានប្រាប់ កម្ពុជាថ្មី កាលពីថ្ងៃទី១៣សីហា ម្សិលមិញនេះថា បញ្ហានេះលោកបានលើកគម្រោងអភិវឌ្ឍន៍ផ្លូវ៩៥នេះរួចហើយ ប៉ុន្តែមន្រ្តីជំនាញកំពុងធើ្វការផ្លាស់ប្តូរប្រព័ន្ធលូជាមុនសិន ទើបមានការយឺតយ៉ាវក្នុងការជួសជុល។ លោកក៏សុំការអធ្យាស្រ័យពីសំណាក់ប្រជាពលរដ្ឋដែលរស់នៅតំបន់នោះដោយមានការយឺតយ៉ាវក្នុងការជួសជុលផ្លូវដើម្បីប្រជាពលរដ្ឋធ្វើដំណើរបានស្រួល៕

អត្ថបទ៖ ម៉េង