នគរបាលព្រហ្មទណ្ឌកម្រិតស្រាលបញ្ជូនជនសង្ស័យ​​៥នាក់ទៅតុលាការ ពាក់ព័ន្ធករណីឆក់ ៥ករណី

កម្លាំងនគរបាលការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ នៅរសៀលថ្ងៃទី២២ ខែតុលា ឆ្នាំ២០២៤នេះ បានកសាងសំណុំរឿងបញ្ជូនខ្លួនក្រុមជនសង្ស័យ៥នាក់ ពាក់ព័ន្ធករណីឆក់ចំនួន៥ករណីទៅសាលាដំបូងរាជធានីភ្នំពេញ ដើម្បីអនុវត្តតាមនីតិវិធីច្បាប់។ ការបញ្ជូនខ្លួនក្រុមជនសង្ស័យទាំង៥នាក់នេះ គឺធ្វើឡើងបន្ទាប់កម្លាំងជំនាញស្រាវជ្រាវឃាត់ខ្លួនក្រុមជនសង្ស័យជាបន្តបន្ទាប់ ក្រោយពីធ្វើសកម្មភាពឆក់ និងលួចសម្ភារ និងទ្រព្យសម្បត្តិពីប្រជាពលរដ្ឋបានសម្រេចជាច្រើនករណីក្នុងភូមិសាស្ត្ររាជធានីភ្នំពេញ។

របាយការណ៍របស់សមត្ថកិច្ចបានឲ្យដឹងថា ជនសង្ស័យទាំង៥នាក់មាន ទី១ ឈ្មោះ ម៉ៅ រេីន ហៅ យ៉ា ភេទប្រុស ទីមាន២-ឈ្មោះ ហឿន សីហា ហៅ ដូច ភេទប្រុស​ ទី៣-ឈ្មោះ វាន់ បញ្ញ ហៅ ហ្វាញ្ញ ភេទប្រុស ទី៤-ឈ្មោះ ជា សីហា ហៅ សត្យា ភេទប្រុស ៥-ឈ្មោះ រដ្ឋា ខ្វាន់អ៊ូ ហៅ អ៊ូ ភេទ ប្រុស។

សូមជម្រាបថា កាលពីថ្ងៃទី១៨ ខែតុលា ឆ្នាំ២០២៤កន្លងទៅ កម្លាំងនគរបាលព្រហ្មទណ្ឌកម្រិតស្រាល នៃស្នងការដ្ឋាននគរបាលរាជធានីភ្នំពេញ បានដឹកនាំកម្លាំងចុះបង្ក្រាប និងឃាត់ខ្លួនជនសង្ស័យ៥នាក់ជាបន្តបន្ទាប់ពាក់ព័ន្ធករណីឆក់ កាបូប និងទូរសព្ទ័ ចំនួន០៥ករណីផ្សេងគ្នា។

នគរបាលបានអោយដឹងទៀតថា ករណីទី១៖ លួចយកកាបូប នៅចំណុច ផ្លូវលំ ភូមិព្រែកទាល់ សង្កាត់មានជ័យទី២ ខណ្ឌមានជ័យ កាលពីថ្ងៃទី២ ខែកញ្ញា ឆ្នាំ២០២៤ វេលាម៉ោង៦:០៥ទាបភ្លឺ។ ករណីទី២៖ លួចយកកាបូប នៅចំណុច ផ្លូវលំ សង្កាត់ចាក់អង្ក្រែក្រោម ខណ្ឌមានជ័យ កាលពីថ្ងៃទី២៤ខែកក្កដា ឆ្នាំ២០២៤ វេលាម៉ោង១៨:៣០យប់។ ករណីទី៣៖ លួចយកកាបូប នៅចំណុច ផ្លូវលំ ភូមិស្រុកចេក សង្កាត់ជេីងឯក ខណ្ឌដង្កោ កាលពីថ្ងៃទី៣ ខែកក្កដា ឆ្នាំ២០២៤ វេលាម៉ោង៦:១៥ទាបភ្លឺ។ ករណីទី៤៖ ឆក់យកកាបូប និងទូរស័ព្ទដៃ នៅចំណុចមុខផ្ទះលើដងផ្លូវ២៧១ ភូមិ០១ សង្កាត់ ទួលទំពន់ទី២ ខណ្ឌចំការមន កាលពីថ្ងៃទី១១ខែតុលា ឆ្នាំ២០២៤ វេលាម៉ោងប្រហែល០៦:១៣ទាបភ្លឺ។ ករណីទី៥៖ ឆក់យកថង់ខ្មៅ នៅចំណុច ផ្លូវស្ពានអាកាសស្ទឹងមានជ័យ ភូមិមានជ័យ សង្កាត់មានជ័យទី១ ខណ្ឌមានជ័យ កាលពីថ្ងៃទី ខែសីហា ឆ្នាំ២០២៤ វេលាម៉ោង៦:២៥ទាបភ្លឺ៕

អត្ថបទ៖ សំណាង