អជ្ញាធរ ចុះអនុវត្តវិធានការច្បាប់ចំពោះអ្នករុករករ៉ែមាសអនាធិបតេយ្យនៅមណ្ឌលគិរី

រដ្ឋបាលខេត្តមណ្ឌលគិរី សហការជាមួយក្រសួងរ៉ែ និងថាមពល អង្គភាពប្រឆាំងអំពើពុករលួយ និងក្រុមការងារចម្រុះ បានចុះអនុវត្តវិធានការច្បាប់ ចំពោះប្រជាពលរដ្ឋ ដែលពាក់ព័ន្ធនឹងការប្រកបរបររ៉ែមាសអនាធិបតេយ្យ តាមរូបភាពផ្សេងៗ ដូចជា កកាយ ចោះ កាត់បំផ្លាញបេតុងគម្របរណ្ដៅរ៉ែ ជីក កិន រែង ប្រមូលកាកសំណល់ និងរ៉ែគ្រប់ប្រភេទ នៅភូមិពូទុង ឃុំចុងផ្លាស់ ស្រុកកែវសីមា។ នេះបើយោងតាមសេចក្ដីជូនដំណឹងរបស់រដ្ឋបាលខេត្តមណ្ឌលគិរី ដែលកម្ពុជាថ្មី ទទួលបាន នាថ្ងៃទី៤ ខែវិច្ឆិកានេះ។

នៅក្នុងសេចក្ដីជូនដំណឹងនោះ រដ្ឋបាលខេត្ត បានសង្កត់ធ្ងន់ថា អ្នកពាក់ព័ន្ធទាំងឡាយ ត្រូវបញ្ឈប់គ្រប់សកម្មភាពខាងលើ ចាប់ពីថ្ងៃជូនដំណឹង ព្រមទាំងរុះរើប្រមូលសម្ភារៈដោយខ្លួនឯង។ ក្នុងករណីមិនព្រមអនុវត្ត ក្រុមការងារនឹងចុះរុះរើ សម្អាត ដើម្បីលុបបំបាត់សកម្មភាពអនាធិបតេយ្យទាំងនោះ។

សូមអានសេចក្ដីជូនដំណឹងទាំងស្រុងរបស់រដ្ឋបាលខេត្តមណ្ឌលគិរី ខាងក្រោមនេះ៖

អត្ថបទ៖ រៀម សុខហេង