ឃាត់ខ្លួនក្រុមក្មេងទំនើង៧នាក់ ក្រោយបង្កហិង្សាកាប់បំផ្លាញម៉ូតូជនរងគ្រោះដល់បន្ទប់ជួល

ក្រុមក្មេងទំនើងរហ័សនាម D4«ដៃបួន» ចំនួន៧នាក់ ត្រូវបានកម្លាំងនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងនគរបាលខណ្ឌដង្កោ ស្រាវជ្រាវបង្ក្រាបបានជាបន្តបន្ទាប់ ក្រោយពួកគេធ្វើសកម្មភាពសម្រុកចូលកាប់បំផ្លាញម៉ូតូចំនួន២គ្រឿងដល់បន្ទប់ជួល កាលពីវេលាម៉ោង១រំលងអាធ្រាតឈានចូលថ្ងៃទី១៥ ខែធ្នូ ឆ្នាំ២០២៤ នៅចំណុចផ្ទះជួលមួយកន្លែង តាមបណ្តោយផ្លូវបេតុង ក្រោយបុរីពិភពថ្មី វត្តឬស្សីសាញ់ សង្កាត់ព្រៃស ខណ្ឌ ដង្កោ រាជធានីភ្នំពេញ។

ការឃាត់ខ្លួនក្រុមក្មេងទំនើងនេះ បានធ្វើឡើងកាលពីរសៀលថ្ងៃទី១៥ ខែធ្នូ ឆ្នាំ២០២៤ តាមបទបញ្ជារបស់លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងលោកឧត្តមសេនីយ៍ត្រី ប៊ុន សត្យា ស្នងការរងទទួលផែនការងារនគរបាលព្រហ្មទណ្ឌ និងមានការដឹកនាំបញ្ជាផ្ទាល់ដោយលោកឧត្តមសេនីយ៍ទោ លី ប៊ុនអេង ស្នងការរងទទួលដឹកនាំការិយាល័យ ចុះស្រាវជ្រាវរហូតឈានដល់ការឃាត់ខ្លួនក្រុមជនសង្ស័យជាបន្តបន្ទាប់ សរុបចំនួន៧នាក់ ម៉ូតូ៣គ្រឿង និងកាំបិតប៉័ងតោចំនួន១ ស្លាកលេខម៉ូតូចំនួន១ យកមកប៉ុស្តិ៍នគរបាលព្រៃស ដើម្បីសាកសួរនាំ។

បច្ចុប្បន្នជនសង្ស័យរួមទាំងវត្ថុតាង ត្រូវបានប្រគល់ឱ្យនគរបាលខណ្ឌដង្កោ ដែលជាម្ចាស់ករណីដើម្បីបន្តនិតិវិធី និងស្រាវជ្រាវបក្ខពួកដែលនៅសេសសល់បន្តទៀត៕

អត្ថបទ៖ សំណាង