នគរបាលខណ្ឌ៧មករា ដាក់កម្លាំងប្រចាំការ២៤​ម៉ោងនៅតំបន់បុរីកីឡាដើម្បីបង្ក្រាបបទល្មើស និងក្មេងទំនើង

អធិការដ្ឋាននគរបាលខណ្ឌ៧មករា បានដាក់កម្លាំងប្រចាំការ២៤ម៉ោង លើ២៤ម៉ោង ដើម្បីចាំទប់ស្កាត់បង្ក្រាបបទល្មើស ជាពិសេសក្រុមក្មេងទំនើង។ ការដាក់កម្លាំងប្រចាំការ២៤លើ២៤ម៉ោងនេះ ដោយសារតំនប់បុរីកីឡាជាតំបន់ស្មុកស្មាញ និងសម្បូរក្រុមក្មេងទំនើង។

លោកវេសេនីយ៍ទោ ជុន ប៊ុនណាន អធិការនៃអធិការដ្ឋាននគរបាលខណ្ឌ៧មករា បានប្រាប់អោយដឹងថា លោកបានចាត់កម្លាំងល្បាតគ្រប់ប៉ុស្តិ៍ទាំង៨ ចេញល្បាតទាំងថ្ងៃទាំងយប់ ពោលគឺមានការផ្លាស់ប្តូរវេនគ្នា ២៤ម៉ោង លើ២៤ម៉ោង ជាពិសេសនៅចំណុចតំបន់បុរីកីឡាតែម្តង ដែលជាតំបន់ស្មុគស្មាញ់ និងសម្បូរក្រុមក្មេងទំនើង និងការពារបទល្មើសផ្សេងៗ ជូនប្រជាពលរដ្ឋ។

លោកអធិការខណ្ឌ៧មករា ក៏បានសំណូមពរទៅកាន់ប្រជាពលរដ្ឋដែលរស់នៅមូលដ្ឋានខណ្ឌ៧មករាទាំងអស់ សូមជួយសហការ និងផ្តល់ព័ត៍មានដល់អាជ្ញាធរ ដើម្បីបង្ការការពារជូនប្រជាពលរដ្ឋឲ្យទាន់ពេលវេលា។

លោក សារ៉ាត់ ផល្លា ជាប្រជាពលរដ្ឋរស់នៅតំបន់បុរីកីឡាបានអោយដឹងថា ប្រជាពលរដ្ឋបានសាទរទៅកាន់កម្លាំងអាជ្ញាធរមានសមត្ថកិច្ច ដែលបានបង្ការទប់ស្កាត់បង្រ្កាបបទល្មើសផ្សេងៗក្នុងមូលដ្ឋាន ដោយសារតំបន់នេះ ជាតំបន់មួយដែលសម្បូរទៅដោយក្រុមក្មេងទំនើង។ លោកបន្តថា ចាប់តាំងពីមានកម្លាំងសមត្ថកិច្ចល្បាតជាប្រចាំមក បញ្ហាបទល្មើសមួយចំនួន រួមទាំងក្មេងទំនើងមានការចុះថយជាខ្លាំង៕

អត្ថបទ៖ រដ្ឋា