អាវុធហត្ថស្រុកអង្គរបុរី ឃាត់ខ្លួនអ្នកនេសាទ​៣​នាក់​ដែលតាំងខ្លួនជាមន្ត្រីជលផល ដកហូតបានខ្នោះដៃ និងវិទ្យុទាក់ទង

អ្នកនេសាទ៣នាក់ត្រូវបានកម្លាំងកងរាជអាវុធហត្ថស្រុកអង្គរបុរី ធ្វើការឃាត់ខ្លូនកាលពីវេលាម៉ោង១និង៣០នាទីរំលងអធ្រាតចូលថ្ងៃទី៩ ខែមករា ឆ្នាំ២០២៥ នៅចំណុចភូមិទួលសាំង(ក) ឃុំអង្គរបុរី ស្រុកអង្គរបុរី ខេត្តតាកែវ។

តាមរបាយកាណ៍របស់សមត្ថកិច្ចបានឱ្យដឹងថា ជនសង្ស័យទាំង៣មានឈ្មោះទី១ឈ្មោះ ចក់ មុំ ភេទប្រុស អាយុ៣០ឆ្នាំ ទី២ឈ្មោះ ចក់ គិន ភេទប្រុស អាយុ២០ឆ្នាំ ទី៣ឈ្មោះ​ កូប កូសេន ភេទប្រុស​ អាយុ៣០ឆ្នាំ។ ជនសង្ស័យទាំង៣នាក់ មានមុខរបរជាអ្នកនេសាទ។

ក្រោយឃាត់ខ្លូនសមត្ថកិច្ចបានដកហូតវត្ថុតាងរួមមានខ្នោះដៃ១គូ វិទ្យុទាក់ទង១គ្រឿង ទូរសព្ទ័ដៃ២គ្រឿង កាំបិតបត់១ ម៉ូតូ១គ្រឿងម៉ាកសង់សេ១២៥សេរី២០១៧។

យោងតាមប្រភពពីក្រុមមន្រ្តីមានសមត្ថកិច្ចច្បាស់ការសុំមិនបញ្ជេញឈ្មោះ បានឱ្យដឹងថា ជនសង្ស័យខាងលើតាំងខ្លូនជាមន្រ្តីជលផលដែលមានមេក្លោងឈ្មោះ អ៊ឹម ឧត្តម (ហៅ ចិត្ត) នាយសង្កាត់រដ្ឋបាលជលផលស្លែង បានដើរចាប់ជំរិតលុយពលរដ្ឋចូលនេសាទ នៅស្រុកអង្គរបុរីជាហូហែរ។ ប្រភពដដែលបានបន្តទៀតថា ជនសង្ស័យបានដើរចាប់ពលរដ្ឋ ដែលចូលនេសាទតាមផ្ទៃបឹងមិនថាខុសច្បាប់ ឬត្រូវច្បាប់នោះទេ បើមិនឱ្យលុយពួកគេ គឺចាប់ពលរដ្ឋវាយខ្នោះយកមកឱ្យលោក អ៊ឹម ឧត្តម ដើម្បីជំរិតយកលុយជាថ្នូរនឹងការមិនបញ្ជូនទៅតុលាកា។ យោងតាមប្រភពដដែលបានឱ្យដឹងទៀតថា ខ្នោះដៃដែលមន្រ្តី្តអាវុធហត្ថឃាត់បានជារបស់លោក អ៊ឹម ឧត្តម។

ជុំវិញករណីខាងលើលោក​ អ៊ឹម ឧត្តម នាយសង្កាត់រដ្ឋបាលជលផលស្លែង បានឱ្យដឹងថា ករណីឃាត់ខ្លូនជនសង្ស័យ៣នាក់ខាងលើ កម្លាំងអាវុធហត្ថដកហូតបានវិទ្យុទាក់ទង និងខ្នោះដៃ គឺជារបស់លោកពិតប្រាកដមែន ព្រោះលោកភ្លេចនៅលើទូក ហើយលោកបានប្រាប់គាត់ឱ្យរក្សាទុកឱ្យលោកផង ចំណែករឿងចុះបង្ក្រាបរាល់បទល្មើសនេសាទ គឺលោកបានឱ្យពួកគាត់ជួយបើកទូក ជូនលោកចុះបង្ក្រាបជាមួយគ្នា ហើយពួកគាត់មិនមែនជាមន្រ្តីជលផល ឬមន្រ្តីជាប់កិច្ចសន្យានោះទេ។

បច្ចុប្បន្នជនសង្ស័យទាំង៣នាក់ខាងលើ កំពុងសាកសួរនៅការិយាល័យព្រហ្មទណ្ឌនៃបញ្ជាការដ្ឋានកងរាជអាវុធហត្តខេត្តតកែវ៕

​អត្ថបទ៖ វីរៈ