ស្នងការរាជធានី បង្ហើបពីយុទ្ធសាស្ត្របង្ក្រាបឧក្រិដ្ឋជនកែច្នៃ និងចែកចាយគ្រឿងញៀនបានជោគជ័យ

លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនៃស្នងការដ្ឋាននគរបាលរាជធានីភ្នំពេញ កាលពីពេលថ្មីៗនេះ បានបង្ហើបពីយុទ្ធសាស្ត្របង្ក្រាបក្រុមឧក្រិដ្ឋជនកែច្នៃ និងចែកចាយគ្រឿងញៀនរហូតបានជោគជ័យ ដោយបានឃាត់ខ្លួនអ្នកជំនាញបច្ចេកទេសកែឆ្នៃ និងជនសង្ស័យមួយចំនួនរួមទាំងវត្ថុតាង។

បើតាមលោក ជួន ណារិន្ទ យុទ្ធសាស្ត្របង្ក្រាបក្រុមឧក្រិដ្ឋជនកែច្នៃ និងចែកចាយគ្រឿងញៀននេះ បានបែងចែកចេញជាពីរដំណាក់កាល ទី១. បង្ក្រាបករណីកែច្នៃគ្រឿងញៀន បាន៣ករណី ឃាត់ខ្លួនមនុស្ស៧នាក់ ជាជនបរទេស ដកហូតថ្នាំបានមួយចំនួន ហើយថ្នាំទាំងអស់នេះ គឺក្រុមជនសង្ស័យបានយកទៅចែកចាយក្នុងទីតាំងសប្បាយៗ និងពីរាជធានីភ្នំពេញទៅបណ្ដាខេត្ត និងពីបណ្ដាខេត្តចូលមករាជធានី។ ចំណែកដំណាក់កាលទី២ បង្ក្រាបករណីចែកចាយគ្រឿង​ញៀនបាន ៣ករណី ឃាត់មនុស្ស១៧នាក់ មានទាំងជនជាតិខ្មែរ និងជនបរទេស។ បើតាមលោកស្នងការ ក្រុមឧក្រិដ្ឋជនទាំងនេះ បានជួលទីតាំងជ្រកក្រោមស្លាកខុនដូរនានាក្នុងរាជធានីភ្នំពេញ។

លោកស្នងការ បញ្ជាក់ថា ការប្រើយុទ្ធសាស្ត្រនេះ គឺជាការកាត់ផ្ដាច់ដំណើរការរវាងក្រុមអ្នកកែឆ្នៃ និងក្រុមអ្នកចែក​ចាយ​សារធារញៀនបានដល់ឬសគល់តែម្ដង។

នាឱកាសនោះ លោក ជួន ណារិន្ទ ក៏បានណែនាំដល់អធិការដ្ឋាននគរបាលខណ្ឌទាំង១៤ ឱ្យមានវិធានការសាធារណៈ ចុះផ្សព្វផ្សាយដល់ម្ចាស់អគារខុនដូរជួលស្នាក់ដើម្បីឱ្យពួកគាត់យល់ដឹងពីផលប៉ះពាល់ពីបញ្ហាគ្រឿងញៀន ហើយបានក៏សំណូមពរឱ្យម្ចាស់ទីតាំងអគារខុនដូរជួល រាល់អ្នកមកជួលស្នាក់នៅត្រូវមានលិខិតច្បាស់លាស់ដូចជា អត្តសញ្ញាណប័ណ្ណ និងលិខិតឆ្លងដែន ជាដើម៕

អត្ថបទ៖ សំណាង