ឆេះម៉ាស៊ីនច្រូតពោត និងរថយន្តមួយគ្រឿងកើតឡើងដោយសារការផ្សារដែកមិនប្រយ័ត្ន

រថយន្តដឹកទំនិញប្រភេទទម្ងន់ ៥តោន និងម៉ាស៊ីនច្រូតពោតមួយគ្រឿង ត្រូវបានអណ្ដាតភ្លើងឆាបឆេះទាំងស្រុង បន្ទាប់ពីមានករណីផ្សារដែក ដែលបង្កឲ្យមានផ្កាភ្លើងឆាបឆេះរាលដាលតាមប្រេងម៉ាស៊ីន ទើបបង្កទៅជាអគ្គិភ័យតែម្ដង។

ហេតុការណ៍គ្រោះអគ្គិភ័យនេះបានកើតឡើងកាលពីល្ងាចថ្ងៃទី១៣ ខែសីហា ឆ្នាំ២០២៥ នៅចំណុចមុខផ្ទះឈ្មោះ គី ផៃ ភេទប្រុស អាយុ៦៨ឆ្នាំ នៅភូមិបឹងរាំង ឃុំបឹងរាំង ស្រុកកំរៀង ខេត្តបាត់ដំបង។ ក្រោយពេលសមត្ថកិច្ចចុះត្រួតពិនិត្យ គឺករណីគ្រោះអគ្គិភ័យនេះ បណ្ដាលឲ្យខូចខាតម៉ាស៊ីនច្រូតពោតចំនួន០១គ្រឿង ខូចខាតទាំងស្រុង និងរថយន្ដសម្រាប់ដឹកចំណុះ៥តោន ខូចខាត៥០% ដែលជារបស់ឈ្មោះ ផាន់ ចាន់ដេត ភេទប្រុស អាយុ៤០ឆ្នាំ រស់នៅភូមិសាមគ្គីមានជ័យ ឃុំពេជ្រចិន្ដា ស្រុកភ្នំព្រឹក ខេត្តបាត់ដំបង។

ក្នុងករណីអគ្គិភ័យនេះ សមត្ថកិច្ចបានបញ្ជាក់ថា បណ្ដាលមកពីការផ្សារដែកមិនប្រយ័ត្ន ដោយមានប្រេងម៉ាស៊ូតនៅជិត ទើបបណ្ដាលឲ្យមានការឆាបឆេះតែម្តង ប៉ុន្តែនៅក្នុងករណីនេះមិនបណ្ដាលឲ្យមានការរងរបួសដល់មនុស្សឡើយ៕

អត្ថបទ៖ សោ និយមរ័ត្ន