សមាគមអ្នកជិះកង់ដើម្បីសុខភាព និងការអភិវឌ្ឍ៖ វីដេអូដែលបានបង្ហោះ ជាវីដេអូមួយជ្រុងតែប៉ុណ្ណោះ

សមាគមអ្នកជិះកង់ដើម្បីសុខភាព និងការអភិវឌ្ឍ បានបញ្ជាក់ថា វីដេអូដែលបានបង្ហោះឃើញមានអ្នកជិះកង់តែ ២ ឬ៣ នាក់ ជាវីដេអូមួយជ្រុងតែប៉ុណ្ណោះ។ សមាគមអ្នកជិះកង់ដើម្បីសុខភាព និងការអភិវឌ្ឍ គូសបញ្ជាក់ថា ការជិះកង់ហាត់ប្រាណដែលមានរថយន្តសារ៉េនបើកនាំផ្លូវការពារសុវត្ថិភាពគ្រប់ពេលនេះ គឺធ្វើឡើងនៅពេលដែលមានកម្មវិធីជិះកង់លក្ខណៈមនុស្សធម៌ ឬទ្រង់ទ្រាយធំ មានសមាជិកជិះកង់ច្រើនក្នុងរយៈចម្ងាយឆ្ងាយ និងនៅពេលព្រឹកទាបភ្លឺតែប៉ុណ្ណោះ ដើម្បីសុំការអន្តរាគមន៍ពីសមត្ថកិច្ចជួយសម្រួលចរាចរណ៍។

ការចេញមកបំភ្លឺនេះ ក្រោយពីផេកសារព័ត៌មាន PVN NEWS បានចេញផ្សាយតាមរយៈបណ្តាញទំនាក់ទំនងហ្វេសប៊ុកថា «ហាត់ប្រាណឯកជនខ្លួនឯង ពុលនឹងអំនួត ឆ្កួតនឹងអំណាចបែរជាយករថយន្តរដ្ឋ ប្រេងរដ្ឋ ទៅហែរហម ខុសគោលការណ៍ស្ថាប័នទៅវិញ» ដែលការចុះផ្សាយនេះ បានធ្វើឲ្យមហាជនជាច្រើនបញ្ចេញមតិរិះគន់ទៅលើស្ថាប័ននគរបាលយ៉ាងចាស់ដៃ។

តាមរយៈសេចក្ដីបំភ្លឺ នៅថ្ងៃទី២៣ ខែកញ្ញា ឆ្នាំ២០២៥នេះ សមាគមអ្នកជិះកង់ដើម្បីសុខភាព និងការអភិវឌ្ឍ ថា ការចុះផ្សាយថា “ដើម្បីសុវត្ថិភាពពេលជិះកង់ហាត់ប្រាណ គួរតែយករថយន្តសារ៉ែន បើកនាំផ្លូវបែបនេះទើបបាន” សមាគមក៏បានបញ្ជាក់ដែរថា គ្រប់ការជិះកង់ហាត់ប្រាណ សមាគមមិនបានស្នើសុំអោយមានរថយន្តសារ៉េនបើកនាំផ្លូវការពារសុវត្ថិភាពគ្រប់ពេលនោះទេ។ ការស្នើសុំធ្វើឡើងតែនៅពេលដែលមានកម្មវិធីជិះកង់លក្ខណៈមនុស្សធម៌ ឬទ្រង់ទ្រាយធំ មានសមាជិកជិះកង់ច្រើន ក្នុងរយៈចម្ងាយ ឆ្ងាយ និងនៅពេលព្រឹកទាបភ្លឺ ដើម្បីសម្រួលចរាចរណ៍តែប៉ុណ្ណោះ ហើយចំពោះវីដេអូដែលបានបង្ហោះ ឃើញមានអ្នកជិះកង់តែ ២ ឬ៣ នាក់ ជាវីដេអូមួយជ្រុងតែប៉ុណ្ណោះ។

តាមរយៈសេចក្ដីបំភ្លឺ សមាគមអ្នកជិះកង់ដើម្បីសុខភាព និងការអភិវឌ្ឍ ត្រូវបានបង្កើតឡើងស្របតាមច្បាប់ បានចុះបញ្ជី សមាគមនៅក្រសួងមហាផ្ទៃ និងបានទទួលស្គាល់ដោយប្រកាសលេខ ៥៦៥១ ចុះថ្ងៃទី០៥ ខែកញ្ញា ឆ្នាំ២០១៨ របស់ក្រសួងមហាផ្ទៃ គោលបំណងដើម្បីកៀគរ និងលើកទឹកចិត្តប្រជាពលរដ្ឋ មន្ត្រីរាជការដែលស្រលាញ់សុខភាព ដោយការជិះកង់ហាត់ប្រាណ និងធ្វើការងារសង្គមមួយចំនួន ដែលមានសមាជិកទាំងអស់ប្រមាណ ៣០០នាក់ ព្រមទាំងមានឯកសណ្ឋានសមាគមត្រឹមត្រូវ ដោយពីថ្ងៃចន្ទ ដល់ថ្ងៃសៅរ៍ មានឯកសណ្ឋានពណ៌ លឿង និងនៅថ្ងៃអាទិត្យ មានឯកសណ្ឋានពណ៌ក្រហម៕

អត្ថបទ៖ សុខុម