ជីវិតកម្សាន្ដ

ក្រោយផ្ទុះការរិះគន់មិនឲ្យតម្លៃក្រុម Hashtag band ថ្ងៃសង្ក្រាន្ត គណៈគ្រប់គ្រងសាលាចេញសេចក្ដីបំភ្លឺ

បានផុស

២ years មុន

នៅ

ថ្ងៃព្រហស្បតិ៍ ១១ មេសា ២០២៤

ដោយ

បន្ទាប់ពីផ្ទុះការរិះគន់បាញ់ចាក់ស្រោចដូចទឹកបាក់ទំនប់ពាក់ព័ន្ធរឿងរ៉ាវថ្ងៃសង្ក្រាន្តនៅវិទ្យាល័យព្រះសីហនុខេត្តកំពង់ចាម ដែលមានការលើកឡើងថា គណៈគ្រប់គ្រងសាលាមិនឲ្យតម្លៃ និងប្រើកាយវិការខ្វះសីលធម៌ទៅលើក្រុមតន្ត្រី Hashtag band នោះ ពេលនេះខាងគណៈគ្រប់គ្រងសាលាបានចេញសេចក្ដីបំភ្លឺជុំវិញករណីនេះ។

នៅក្នុងសេចក្ដីបំភ្លឺរបស់គណៈគ្រប់គ្រងសាលាវិទ្យាល័យព្រះសីហនុ កាលពីថ្ងៃទី ១០ ខែមេសា ចុះហត្ថលេខាដោយលោក ផាវ សុខផល បានបញ្ជាក់ថា ពាក់ព័ន្ធនឹងការផ្សព្វផ្សាយ ឬ បង្ហោះចោទប្រកាន់ពីសំណាក់ក្រុម Hashtag band ដែលនិយាយថា ខាងគណៈគ្រប់គ្រងមិនផ្តល់តម្លៃចំពោះក្រុមរបស់ខ្លួននោះ ខាងសាលាសូមធ្វើការបដិសេធន៍ទាំងស្រុង ដោយហេតុផលថា យើងខ្ញុំមិនមានចេតនាមើលងាយសិល្បៈដូចការលើកឡើងរបស់គេហទំព័រហ្វេសប៊ុក Hashtag band នោះឡើយ។

យើងខ្ញុំសូមជម្រាបសាធារណជនមេត្តាជ្រាបថា ក្រុម Hashtag band ដែលមកចូលរួមច្រៀងនៅក្នុងកម្មវិធីសង្ក្រាន្ត កាលពីល្ងាចថ្ងៃទី ៨ ខែមេសា ឆ្នាំ ២០២៤ នោះ គណៈគ្រប់គ្រងសាលាសូមបញ្ជាក់,១.មិនបានជួល ឬ អញ្ជើញពួកគាត់មកចូលរួមសម្តែងទេ ហើយពួកគាត់ក៏មិនបានមកសុំការអនុញ្ញាតពីគណៈគ្រប់គ្រងសាលាផ្ទាល់ដែរ។ ២.ដោយសេចក្ដីស្រលាញ់សិល្បៈ និងការយោគយល់ គណៈគ្រប់គ្រងសាលាមិនបានឃាត់ឃាំងពួកគាត់សម្តែងទេ ទាំងដែលពួកគាត់មិនឲ្យតម្លៃមកលើគណៈគ្រប់គ្រងសាលាបន្តិចសោះ។ ៣.អំឡុងពួកគាត់កំពុងរៀបចំសម្តែង ខ្ញុំបាទ ក្នុងនាមជានាយកសាលា ក៏បានព្យាយាមសូមសំណូមពរក្រុមការងាររបស់ Hashtag band ស្ងាត់ៗ នៅខាងក្រោយឆាកពីរដងរួចមកហើយ ដោយសុំឲ្យពួកគាត់សម្តែងតែ ៣ បទ បានហើយ ដោយហេតុថា ខកខានកម្មវិធីរបស់សាលាដែលបានគ្រោងទុក ប៉ុន្តែពួកគាត់នៅតែចចេសចង់សម្តែង ៦ បទ ដោយមិនឲ្យតម្លៃលើកម្មវិធីសង្ក្រាន្តវិទ្យាល័យយើង។ ដូច្នេះហើយ ទើបនាយករងសាលាដែលជាគណៈកម្មការកាន់កម្មវិធីប្រកាសសុំការអធ្យាស្រ័យពីពួកគាត់ម្តងទៀត ឲ្យសម្តែងតែ ៣ បទ បានហើយ។

សេចក្ដីបំភ្លឺ បានចាត់ទុកថា ការបង្ហោះផ្សព្វផ្សាយនៅលើបណ្ដាញសង្គមពីសំណាក់ក្រុម Hashtag band ធ្វើឲ្យប៉ះពាល់ដល់សេចក្ដីថ្លៃថ្នូរកិត្តិយសកេរ្តិ៍ឈ្មោះគណៈគ្រប់គ្រងសាលាវិទ្យាល័យព្រះសីហនុនៅក្នុងសង្គម ពិសេសធ្វើឲ្យសាធារណជនមានការយល់ច្រឡំរហូតមានការជេរប្រមាថតាមរយៈបណ្ដាញសង្គមយ៉ាងធ្ងន់ធ្ងរ៕

អត្ថបទ ៖ ចាន់រ៉ា