ហេតុអ្វី Ronaldo បានជួបលោកប្រធានាធិបតី ត្រាំ និងមហាសេដ្ឋីកំពូលៗនៅសេតវិមាន?

កីឡាករបាល់ទាត់ដ៏ល្បី Cristiano Ronaldo បានក្លាយជាភ្ញៀវកិត្តិយសដ៏គួរឱ្យភ្ញាក់ផ្អើលម្នាក់ នៅក្នុងពិធីទទួលទានអាហារពេលល្ងាចដ៏ប្រណីតនៅសេតវិមាន ដែលរៀបចំដោយលោកប្រធានាធិបតីអាមេរិក ដូណាល់ ត្រាំ ក្នុង​ពេល​ទស្សនៈកិច្ចរបស់រាជទាយាទអារ៉ាប៊ីសាអូឌីត ព្រះអង្គម្ចាស់ Mohammed bin Salman។

Ronaldo ទទួលបានឱកាសចូលរួមក្នុងកម្មវិធីអាហារពេលល្ងាចនេះ ដែលមានការចូលរួមសុទ្ធតែលំដាប់មហាសេដ្ឋីកំពូលៗដូចជា លោក Elon Mask, នាយកក្រុមហ៊ុន Apple លោក Tim Cook និងបុគ្គលដ៏មានឥទ្ធិពល​ជាច្រើនរូបទៀត តាមរយៈរាជទាយាទ Mohammed bin Salman ខណៈ​អត្ថន័យធំនៃកម្មវិធីនេះ គឺបានបង្ហាញពីការរួមបញ្ចូលគ្នានៃ​កីឡា នយោបាយ និងទំនាក់ទំនងអន្តរជាតិ។

ខ្សែប្រយុទ្ធសញ្ជាតិ ព័រទុយហ្គាល់ វ័យ ៤០ ឆ្នាំ តាំងពីចូលរួមជាមួយក្លិប Al Nassr នៅដើមឆ្នាំ ២០២៣ បានក្លាយជាតួអង្គសំខាន់ និងជាបុគ្គលដ៏មានឥទ្ធិពលម្នាក់ ក្នុងយុទ្ធនាការរបស់ អារ៉ាប៊ីសាអ៊ូឌីត ដើម្បីអភិវឌ្ឍសេដ្ឋកិច្ច និងលើកស្ទួយពីការផ្សព្វផ្សាយកិត្យានុភាពប្រទេស​នេះ​នៅលើឆាក​អន្តរជាតិ។ រាជរដ្ឋាភិបាល អារ៉ាប៊ីសាអ៊ូឌីត បានវិនិយោគយ៉ាងច្រើនលើវិស័យកីឡា ជាផ្នែកមួយនៃយុទ្ធសាស្ត្រ “sportswashing” ដើម្បីផ្លាស់ទស្សនៈពិភពលោកពីការរិះគន់ពីសិទ្ធិមនុស្ស និងបរិស្ថាន។

ការអញ្ជើញ Ronaldo ទៅកាន់សេតវិមាន បានក្លាយជាផ្នែកមួយនៃការលើកស្ទួយទំនាក់ទំនងជិតស្និទ្ធរវាងអាមេរិក និង អារ៉ាប៊ីសាអ៊ូឌីត ដោយប្រើតួអង្គដ៏ល្បីល្បាញក្នុងវិស័យកីឡា ដើម្បីទាក់ទាញសារព័ត៌មានធំៗក្នុងពិភពលោក និងការចាប់អារម្មណ៍ពីសាធារណជន។

បន្ទាប់ពីអាហារពេលល្ងាចរួចរាល់ Ronaldo និងគូដណ្តឹងអ្នកនាង Georgina Rodríguez ក៏ទទួលបានឱកាសចូលជួបសម្តែងការគួរសមជាមួយលោក ត្រាំ នៅសេតវិមានដោយផ្ទាល់ផងដែរ។ ក្រោយជួបសំណេះសំណាលបានបញ្ចប់ Ronaldo បានបង្ហោះសារនៅលើទំព័រ Facebook របស់ខ្លួនដូច្នេះ ថា៖ «សូមអរុណ លោក​ប្រធានាធិបតី​សម្រាប់​ការ​អញ្ជើញ និង​ទទួលបានការ​ស្វាគមន៍​យ៉ាងកក់ក្តៅពីអ្នក និងស្ត្រីទី ១ មកកាន់​​ខ្ញុំ និង​អនាគតភរិយារបស់​ខ្ញុំ​។ ពួក​យើងមាន​អ្វី​ម្យ៉ាង​ដែល​មាន​ន័យ​ផ្តល់​ជូន​លោក​ ហើយ​ខ្ញុំ​ត្រៀម​ខ្លួន​រួច​ជា​ស្រេច ​ដើម្បី​ជា​ផ្នែក​មួយ​ក្នុង​ការ​ជំរុញ​លើក​ទឹក​ចិត្ត​អ្នក​ជំនាន់​ក្រោយ ដើម្បី​សាង​អនាគត​​តាម​រយៈ​​ភាព​ក្លាហាន ការ​ទទួល​ខុស​ត្រូវ និង​សន្តិភាព​យូរ​អង្វែង»។

គួរឱ្យដឹងថា នេះជាលើកទី ១ គិតចាប់តាំងពីឆ្នាំ ២០១៦ ដែល Ronaldo បានទៅជាន់ទឹកដី អាមេរិក ជាថ្មី។ វត្តមានរបស់ Ronaldo ត្រូវបានគេដឹង ថា ក៏បានរួមចំណែកផ្សាភ្ជាប់អំពីទំនាក់ទំនងវិស័យកីឡារវាងប្រទេស សហរដ្ឋអាមេរិក និង ព័រទុយហ្គាល់ ផងដែរ ដោយនៅឆ្នាំ ២០២៦ ខាងមុខ ជម្រើសជាតិទាំង ២ នឹងមានការប្រកួតមិត្តភាពមួយជាមួយគ្នា មុនព្រឹត្តិការណ៍ World Cup ២០២៦ មកដល់៕

ប្រែសម្រួល៖ សេម កុសល
ប្រភព៖ Aljazeera