កីឡា

ព្រះខ័នរាជស្វាយរៀង ប៉ះ Al-Kuwait ដណ្តើមជើងឯក AFC Challenge League

បានផុស

២ ខែ មុន

នៅ

ថ្ងៃព្រហស្បតិ៍ ២៣ មេសា ២០២៦

ដោយ

ព្រះខ័នរាជស្វាយរៀង ត្រូវជួបក្រុមខ្លាំងរបស់ប្រទេសគុយវ៉ែត Al-Kuwait ដើម្បីដណ្តើមជើងឯកពានរង្វាន់អាស៊ីលំដាប់ទី៣ AFC Challenge League នៅថ្ងៃទី១៣ ខែឧសភា ឆ្នាំ ២០២៦។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុនឈានដល់វគ្គផ្តាច់ព្រ័ត្រ ក្រុមទាំងពីរសុទ្ធតែធ្វើបានល្អ និងមិនទាន់ស្គាល់បរាជ័យដូចគ្នា។ ក្រុមព្រះខ័នរាជស្វាយរៀង បានឈ្នះ ២ និងស្មើ ១ រកបាន ៧ ពិន្ទុ ឈរលើកំពូលតារាងពូល D។ នៅវគ្គ ៨ ក្រុមចុងក្រោយ ព្រះខ័នរាជស្វាយរៀង ឈ្នះ ភ្នំពេញក្រោន ៤-១ ក្នុងជើងទី១ និងឈ្នះ ២-១ ក្នុងជើងទី២ ហើយវគ្គពាក់កណ្តាលផ្តាច់ស្មើក្រុម Manila Digger ១-១ ក្នុងជើងទី១ និងឈ្នះ ៣-០ ក្នុងជើងទី២។

ចំណែកក្រុម Al Kuwait បានឈ្នះ ២ និងស្មើ ១ រកបាន ៧ ពិន្ទុ ឈរលើកំពូលតារាងពូល B ដែរ។ នៅវគ្គ ៨ ក្រុមចុងក្រោយ ពួកគេបានឈ្នះក្រុម Al Shabak ដោយលទ្ធផល ៥-៣ និងវគ្គពាក់កណ្តាលផ្តាច់ព្រ័ត្រ បានឈ្នះក្រុម Muras United ដោយលទ្ធផល ២-១ ដើម្បីឡើងជួប ព្រះខ័នរាជស្វាយរៀង នៅវគ្គផ្តាច់ព្រ័ត្រ។

ជំនួបវគ្គផ្តាច់ព្រ័ត្ររវាងក្រុមទាំងពីរមិនទាន់ប្រកាសជាផ្លូវការថាតើ ធ្វើនៅប្រទេសណាឡើយ ប៉ុន្តែករណីច្បាស់ ១០០ % គឺធ្វើនៅប្រទេសអាស៊ីខាងលិច។ តាមការគ្រោងទុក ក្រុមរបស់ប្រទេសណាដែលឈានដល់វគ្គផ្តាច់ព្រ័ត្រ ជាអ្នកទទួលធ្វើជាម្ចាស់ផ្ទះគឺប្រទេសគុយវែត ប៉ុន្តែដោយសារមានសង្គ្រាមនៅមជ្ឈិមបូព៌ា អាចមានការប្រែប្រួលទីកន្លែងប្រកួត។ ជាក់ស្តែងការប្រកួតវគ្គ ៨ ក្រុមចុងក្រោយ និងវគ្គពាក់កណ្តាលផ្តាច់ព្រ័ត្រ នៅតំបន់អាស៊ីខាងលិច បានធ្វើនៅប្រទេសគៀរហ្ស៊ីស្ថានតែមួយគត់។

ក្រុម Al Kuwait ជាក្រុមខ្លាំងរបស់ប្រទេស គុយវែត ដែលមានបទពិសោធច្រើនលើឆាកអន្តរជាតិ។ ក្រុមនេះធ្លាប់ប្រកួតពានអាស៊ីកម្រិតទី១ AFC Champions League Elite តាំងពីឆ្នាំ ២០០២ ដល់ ឆ្នាំ ២០០៨ និងធ្លាប់ប្រកួតក្នុងពានកម្រិតទី២ AFC Cup ដែលបច្ចុប្បន្នជា AFC Champions League Two ពីឆ្នាំ ២០០៩ ដល់ ២០១៣ ហើយបានឡើងវគ្គផ្តាច់ព្រ័ត្រ ៤ ដង ក្នុងនោះឈ្នះជើងឯក ៣ ដង និងរងជើងឯក ១ ដង។ ឆ្នាំ ២០២០ ពួកគេបានឡើងទៅពានកម្រិតទី១ វិញ ប៉ុន្តែឆ្នាំ ២០២១ ធ្លាក់ទៅកម្រិតទី២ រហូតដល់រដូវកាល ២០២៤-២៥ ហើយបន្តធ្លាក់មកលេងពានកម្រិតទី៣ AFC Challenge League ដែលឈានដល់វគ្គផ្តាច់ព្រ័ត្រ៕

អត្ថបទ៖ វិរបុត្រ

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា