កីឡា

ល្ងាចនេះមានពិធីដង្ហែម្ចាស់មេដាយមាសប៉េតង់ពិភពលោក

បានផុស

២ years មុន

នៅ

ថ្ងៃអង្គារ ១៦ វិច្ឆិកា ២០២១

ដោយ

ម្ចាស់មេដាយមាសកីឡាប៉េតង់ពិភពលោក កញ្ញា អ៊ុក ស្រីមុំ និងគណៈប្រតិភូនៃក្រុមជម្រើសជាតិប៉េតង់កម្ពុជាផ្នែកនារីនឹងមកដល់មាតុប្រទេសវិញវេលាម៉ោងប្រហែលជា៥:៣៥នាទីល្ងាចនេះ និងមានពិធីទទួល ក៏ដូចជាដង្ហែផងនៅទីក្រុងភ្នំពេញទាំងយប់។

តាមការឲ្យដឹងពីកញ្ញា គីន សំណាង អគ្គលេខាធិការរងនៃសហព័ន្ធកីឡាប៊ូល និងប៉េតង់កម្ពុជាថា ពិធីដង្ហែម្ចាស់មាស និងគណៈប្រតិភូនឹងចាប់ចេញពីព្រលានយន្តអន្តរជាតិភ្នំពេញតាមបណ្តោយមហាវិថីសហព័ន្ធរុស្ស៊ី បន្ទាប់មកបត់ស្តាំមកតាមមហាវិថីព្រះនរោត្តមឆ្ពោះទៅកាន់វិមានឯករាជ្យ។ បន្ទាប់មកបត់ឆ្វេងឡើងទៅរង្វល់មូលនាគបាញ់ទឹក ហើយត្រឡប់មកវិមានឯករាជ្យវិញកាត់តាមមុខភូមិគ្រឹះសម្តេចតេជោ រួចបត់ស្តាំតាមមហាវិថីព្រះនរោត្តមវិញ មុនចូលទៅកាន់ទីស្តីការក្រសួងអប់រំ យុវជន និងកីឡា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងទីស្តីការក្រសួងអប់រំ យុវជន និងកីឡានឹងមានពិធីទទួលស្វាគមន៍ ក៏ដូចជាសំណេះសំណាល់ដោយមានរបាយការណ៍ពីលោក ប៊ុន សុខ ប្រធានមជ្ឈមណ្ឌលអប់រំកាយ និងកីឡា និងរបាយការណ៍ពីលោក សុខ ម៉ុង គ្រូបង្វឹកប៉េតង់ជម្រើសជាតិផ្នែកនារី មុនមតិសំណេះសំណាល់របស់ឯកឧត្តមបណ្ឌិតសភាចារ្យ ហង្សជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។

សូមបញ្ជាក់ថា ល្ងាចនេះក្រុមប៉េតង់ជម្រើសជាតិនារីវិលត្រឡប់មកប្រទេសកំណើតវិញ ហើយវេលាម៉ោងប្រហែលជា៦កន្លះល្ងាចនេះ ក្រុមប៉េតង់ជម្រើសជាតិផ្នែកបុរសនឹងធ្វើដំណើរទៅប្រទេសអេស្ប៉ាញដើម្បីចូលរួមប្រកួតជើងឯកប៉េតង់ពិភពលោកឆ្នាំ២០២១នេះ៕

អត្ថបទ៖ វីរបុត្រ

Related Topics:កីឡាប៉េតង់