កីឡា

សឿយ វិសាល ថាលទ្ធផលស្មើជាមួយឥណ្ឌា ក៏ជាលទ្ធផលគួរឱ្យរីករាយសម្រាប់កម្ពុជា

បានផុស

៤ years មុន

នៅ

ថ្ងៃអង្គារ ៧ មិថុនា ២០២២

ដោយ

ក្រុមបាល់ទាត់ជម្រើសជាតិកម្ពុជា នឹងត្រូវប្រកួតជាមួយ ក្រុមជម្រើសជាតិឥណ្ឌា នាយប់ថ្ងៃទី០៨ ខែមិថុនា ឆ្នាំ២០២២ ស្អែកនេះក្នុងការប្រកួតវគ្គជម្រុះ ពានរង្វាន់បាល់ទាត់ជើងឯកទ្វីបអាស៊ី (AFC Asian Cup 2023) ខណៈសមាជិកក្រុមព្រះខ័នរាជស្វាយរៀង និងជាប្រធានក្រុមជម្រើសជាតិ កីឡាករ សឿយ វិសាល បានអះអាងថាស្មើជាមួយឥណ្ឌា គឺជារឿងដ៏ល្អសម្រាប់កម្ពុជា។

ថ្លែងក្នុងសន្និសីទសារព័ត៌មានមុនការប្រកួតមកដល់ សឿយ វិសាល បាននិយាយដូច្នេះថា «យើងនឹងលេងការប្រកួតដំបូងជាមួយនឹងឥណ្ឌានៅថ្ងៃស្អែក ហើយយើងខានលេងជាមួយពួកគេយូរមកហើយ។ ពួកគេនឹងលេងដោយមានទំនុកចិត្ត និងជឿជាក់លើកលល្បិចរបស់គ្រូបង្វឹករបស់គេ។ យើងនឹងដើរតាមរបៀបរបស់យើងដូចគ្នា ដើម្បីឈ្នះការប្រកួតសម្រាប់ប្រជាជនកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សឿយ វិសាល ប្រាកដជានឹងត្រូវបានស្នើឱ្យពង្រឹងការការពារទល់នឹងឥណ្ឌា។ ហើយរូបគេជឿជាក់ លើទម្រង់របស់គ្រូបង្វឹកក្នុងការជួយក្រុមឱ្យឆ្លងកាត់ការប្រកួតប្រជែងដ៏លំបាកទល់នឹងក្រុមជម្រើសជាតិឥណ្ឌា។

«ឥណ្ឌាគឺជាក្រុមដែលមានចំណាត់ថ្នាក់ខ្ពស់ជាង ហើយមានកីឡាករដែលមានបទពិសោធន៍ពិតប្រាកដ។ លើកនេះយើងមិនអាចនិយាយថា យើងលេងការពារ និងវាយលុក ឬផ្ទុយគ្នាទេ។ យើងនឹងលេងដោយមានទំនុកចិត្ត ១០០ភាគរយ ហើយនឹងធ្វើតាមកលល្បិចរបស់គ្រូបង្វឹក ហើយអ្នករាល់គ្នានឹងឃើញនៅថ្ងៃស្អែកអំពីរបៀបដែលយើងនឹងលេង។ យើងនឹងរីករាយនឹងការប្រកួត សូម្បីតែលទ្ធផលស្មើ ក៏នឹងក្លាយជាលទ្ធផលដ៏គួរឱ្យរីករាយសម្រាប់យើងផងដែរ»។

សូមបញ្ជាក់ថា ការប្រកួតរវាង កម្ពុជា នឹងប៉ះម្ចាស់ផ្ទះ ឥណ្ឌា នាវេលាម៉ោង ១០:០០នាទីយប់ ម៉ោងនៅកម្ពុជា ថ្ងៃទី០៨ ខែមិថុនា ស្អែកនេះ និងមានការផ្សាយផ្ទាល់តាមរយៈស្ថានីយទូរទស្សន៍បាយ័ន និង BTV News ផងដែរ៕

អត្ថបទ ៖ មន្នីរ័ត្ន