ប្រាក់រង្វាន់ពានសម្ដេចតេជោ ហ៊ុន សែន ថ្នាក់ជាតិ កើនឡើងច្រើនជាងរដូវកាលមុន

ប្រាក់រង្វាន់សម្រាប់ក្រុមជើងឯកថ្នាក់ជាតិនៃពានរង្វាន់សម្ដេចអគ្គមហាសេនាបតីតេជោ ហ៊ុន សែន ត្រូវបានដំឡើងច្រើនជាងរដូវកាលមុន។

ជាក់ស្ដែង ក្រុមជើងឯកនឹងទទួលបាន ១១០លានរៀល, លេខ២ បាន ៧០លានរៀល និងលេខ៣បាន ៤០លានរៀល។ បើធៀបនឹងរដូវកាលកន្លងទៅ គឺកើនឡើង​ចំនួន ១០លានរៀលដូចៗគ្នា។

ចំណែកពានរង្វាន់ផ្សេងៗទៀត ក៏មានការបង្កើនប្រាក់រង្វាន់ផងដែរ ពោលគឺ ក្រុមអាជ្ញាកណ្ដាលល្អ បាន ៦លានរៀល, ក្រុម Fair Play បាន ៩លានរៀល, អ្នកទាត់បញ្ចូលទីច្រើនជាងគេ បាន ៤លានរៀល, គ្រូបង្វឹកល្អជាងគេ បាន ៤លានរៀល, អ្នកចាំទីល្អជាងគេ បាន ៤លានរៀល និងកីឡាករល្អជាងគេ បាន ៤លានរៀល ពោលគឺមានការ​កើនឡើងច្រើនជាងមុន ១លានរៀលដូចៗគ្នា។

គួរដឹងដែរថា ការប្រកួតបាល់ទាត់ពានរង្វាន់សម្ដេចអគ្គមហាសេនាបតីតេជោ ហ៊ុន សែន ថ្នាក់ជាតិ នឹងចាប់ផ្ដើមពីថ្ងៃទី២៧ ខែកក្កដា ដោយមាន១៦ក្រុមចូលរួម។ ក្រុមចំនួន៨ពីក្របខណ្ឌ Cambodian Premier League បូករួមទាំងក្រុមចំនួន៨ ទៀតឡើងពីវគ្គជម្រុះថ្នាក់ជាតិ៕