កីឡា

ប្រដាល់សកលកម្ពុជា រកបានគ្រូបង្វឹកថ្មី ធ្លាប់ដឹកនាំកូនសិស្សចេញទៅប្រកួតកីឡាអូឡាំពិក

បានផុស

២ ខែ មុន

នៅ

ថ្ងៃពុធ ២៧ កក្កដា ២០២២

ដោយ

នាពេលថ្មីៗនេះ សហព័ន្ធកីឡាប្រដាល់សកលកម្ពុជា សម្រេចតែងតាំង លោក Kassymkhanov Berikbol Amantayevich ជាគ្រូបង្គោលបន្ថែម សម្រាប់បង្វឹកក្រុមជម្រើសជាតិប្រដាល់សកល ចាប់ពីពេលនេះតទៅ រហូតដល់ខែកក្កដា ឆ្នាំ ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ដោយសហព័ន្ធ នេះជាការជ្រើសរើសមកបន្ថែមគ្រូបង្វឹក ដែលមានស្រាប់ ក្នុងទិសដៅពង្រឹងសមត្ថភាព សម្រាប់ការប្រជែងយកមេដាយ ក្នុងព្រឹត្តិការណ៍កីឡាស៊ីហ្គេម លើកទី ៣២ ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ។

ចំពោះ លោក Kassymkhanov Berikbol Amantayevich មានសញ្ជាតិកាហ្សាក់ស្ថាន ធ្លាប់មានបទពិសោធន៍ជោគជាំ ក្នុងនាមជាគ្រូបង្វឹកប្រដាល់សកល។ ជាងនេះទៅទៀត លោក គឺជាអតីតគ្រូបង្វឹកកីឡាករជម្រើសជាតិវៀតណាមផងដែរ នៅចន្លោះឆ្នាំ ២០១៩-២០២០ ដែលជួយឱ្យបានឡើងទៅប្រកួតក្នុងព្រឹត្តិការណ៍ដ៏ធំ អូឡាំពិក ទីក្រុងតូក្យូ ឆ្នាំ ២០២០ ដែលទើបតែបញ្ចប់កាលពីពេលថ្មីៗនេះ ដែលនេះជាសមិទ្ធផលចុងក្រោយ។

ក្រៅពីនេះលោកធ្លាប់ដឹកនាំ ជម្រើសជាតិមីយ៉ាន់ម៉ា ឆ្នាំ ២០១១ ទៅប្រកួតស៊ីហ្គេម នៅឥណ្ឌូណេស៊ី ដោយពេលនោះលោកដឹកនាំបានឈ្នះមេដាយប្រាក់ ៤ គ្រឿង និងសំរឹទ្ធ ៤ គ្រឿង និងក្នុងឆ្នាំ ២០១៣ ដែលមីយ៉ាន់ម៉ា ធ្វើម្ចាស់ផ្ទះស៊ីហ្គេម លោកក៏បានដឹកនាំក្រុមកីឡាករប្រដាល់សកលមីយ៉ាន់ម៉ា ឈ្នះបានមេដាយមាស ២ គ្រឿង ប្រាក់ ២ គ្រឿង និងសំរឹទ្ធ ២ គ្រឿង ផងដែរ។

នៅឆ្នាំ ២០១៥ លោកបានជួយឱ្យកីឡាការិនីប្រចាំប្រទេសកាហ្សាក់ស្ថាន Nazim Kyzaibai ឈ្នះមេដាយមាស ជើងឯកពិភពលោក World Championship នៅកូរ៉េខាងត្បូង និងនៅឆ្នាំ ២០១៧ លោកបានដឹកនាំក្រុមកីឡាករប្រដាល់សកលកាហ្សាក់ស្ថាន ឈ្នះមេដាយមាស ១ គ្រឿង និងប្រាក់ចំនួន ២ គ្រឿង ក្នុងពានរង្វាន់ជើងឯកអាស៊ី (Asian Championship)។

គួររំលឹកថា ស៊ីហ្គេមលើកទី ៣១ ឆ្នាំ ២០២២ នៅប្រទេសវៀតណាម កីឡាករប្រដាល់សកលកម្ពុជា រកមេដាយបាន ៤ គ្រឿងពីព្រឹត្តិការណ៍ដ៏មានសក្ដានុពលប្រចាំតំបន់ ពោលគឺ ប្រាក់ ១ គ្រឿង និងសំរឹទ្ធ ៣ គ្រឿង៕

អត្ថបទ៖ មន្នីរ័ត្ន