លេចឮដំណឹងថាជម្រើសជាតិកម្ពុជាគ្រោងប្រកួតមិត្តភាពអន្តរជាតិជាមួយបង់ក្លាដេស

ក្រុមបាល់ទាត់ជម្រើសជាតិកម្ពុជា ត្រូវបានដឹងថាគ្រោងនឹងមានការប្រកួតមិត្តភាពអន្តរជាតិកម្ដៅសាច់ដុំ មួយប្រកួតក្នុងអំឡុងថ្ងៃប្រកួត FIFA Day ទល់នឹងបង់ក្លាដេស។ ត្រូវបានដឹងព័ត៌មានបែបនេះគឺដោយយោងតាមវេបសាយកីឡា និងទំព័រអ្នកគាំទ្របាល់ទាត់បង់ក្លាដេស។

នៅក្នុងកាលវិភាគបានកំណត់កាលបរិច្ឆេទមួយដែលជម្រើសជាតិកម្ពុជា ត្រូវប្រកួតមិត្តភាពអន្តរជាតិកម្ដៅសាច់ដុំ ពោលគឺនៅថ្ងៃទី២២ ខែកញ្ញា ឆ្នាំ២០២២ ហើយនឹងធ្វើនៅពហុកីឡដ្ឋានជាតិមរតកតេជោ ថែមទៀតផង។

យ៉ាងណាមិញនេះមិនទាន់ច្បាស់ការនៅឡើយ ដោយរង់ចាំការប្រកាសដោយសហព័ន្ធកីឡាបាល់ទាត់នៃប្រទេសទាំងពីរ (កម្ពុជា និងបង់ក្លាដេស)។

សូមបញ្ជាក់ថា នេះអាចជាការប្រកួតដកស្រង់ ដើម្បីវាស់ស្ទង់ ក៏ដូចជាស្វែងរក និងរក្សាទម្រង់លេងរបស់កីឡាករនៅលើកម្រិតអន្តរជាតិ ជាពិសេសក៏ដើម្បីត្រៀមសម្រាប់ការប្រកួតជើងឯកអាស៊ីអាគ្នេយ៍ (AFF Championship ឬគេនិយមស្គាល់ AFF Suzuki Cup) ឆ្នាំ២០២២ នេះ នៅចុងឆ្នាំអំឡុងខែធ្នូ៕

អត្ថបទ៖ មន្នីរ័ត្ន