អុកចត្រង្គកម្ពុជា ជ្រើសរើសកីឡាករចូលជម្រើស ជាតិ ត្រៀមស៊ីហ្គេម ២០២៣

សហព័ន្ធកីឡាអុកចត្រង្គកម្ពុជា កំពុងធ្វើការជ្រើសរើសកីឡាករ-កីឡាការិនី ដើម្បីចូលក្រុមជម្រើសជាតិ ត្រៀមចូលរួមប្រកួតព្រឹត្តិការណ៍កីឡាអាស៊ីអាគ្នេយ៍ លើកទី៣២ ឆ្នាំ២០២៣ នៅកម្ពុជា។

តាមការបញ្ជាក់ដោយលោក ប៊ិន គាសេង អគ្គលេខាធិការរងសហព័ន្ធកីឡាអុកចត្រង្គកម្ពុជា ទទួលបន្ទុកការងារបច្ចេក​ទេស បានឱ្យដឹងថា សហព័ន្ធកីឡាអុកចត្រង្គកម្ពុជា បាននិងកំពុងជ្រើសរើសកីឡាករ-កីឡាការិនីជម្រើស​ជាតិ​ចំនួន​១១​នាក់ ដើម្បីត្រៀមប្រកួតលើ ៦វិញ្ញាសា ស្មើនឹងការប្រជែងមេដាយមាសចំនួន ៦គ្រឿងក្នុងព្រឹត្តិការណ៍ជាប្រវត្តិសាស្ត្រលើទឹកដីកម្ពុជា។

លោក ប៊ិន គាសេង បានបញ្ជាក់ឲ្យដឹងថា «ការជ្រើសរើសកីឡាករ-កីឡាការិនីសម្រាប់ស៊ីហ្គេមឆ្នាំ២០២៣ខាងមុខនេះ​គឺជារឿងសំខាន់របស់សហព័ន្ធកីឡាអុក ត្រូវបានធ្វើឡើងដោយសម្រិតសម្រាំង មានវិធីសាស្ត្រច្រើនដំណាក់កាល។ដោយសារវិញ្ញាសាផ្នែកអុកយើងមាន ៦វិញ្ញាសា ហើយត្រូវប្រើកីឡាករ-កីឡាការិនី១១នាក់ ប៉ុន្តែដោយមានគោលការណ៍កីឡាករម្នាក់អាចលេងបាន២វិញ្ញាសា អ៊ីចឹងយើងសម្រេចចិត្តជ្រើសរើសកីឡាករផ្នែកបុរស ៩នាក់ ហើយនឹងកីឡាការិនី​២នាក់ ដើម្បីចូលរួមប្រកួតស៊ីហ្គេម ឆ្នាំ២០២៣។»

បច្ចុប្បន្នកីឡាករចំនួន៨រូបត្រូវបានជ្រើសរើសរួចរាល់ហើយ នៅឡើយតែកីឡាករម្នាក់ទៀត ដែលត្រូវប្រកួតជម្រុះក្នុងចំណោម​កីឡាករ ៤នាក់ (ជាជើងខ្លាំងលេខ៣ ក្នុងពូល) ខណៈកីឡាការិនី នឹងត្រៀមធ្វើការប្រកួតជម្រុះក្នុងពេលឆាប់ៗនេះផងដែរ។

ជាបឋម សម្រាប់ប្រភេទកីឡាអុកចត្រង្គ ត្រូវបានដឹងថា មានប្រទេសចំនួន៤ បានបញ្ជាក់ជាផ្លូវការអំពីការចូលរួមប្រកួត ក្នុងនោះរួមមានម្ចាស់ផ្ទះកម្ពុជា, ថៃ, មីយ៉ាន់ម៉ា និងវៀតណាម។ ស្របពេលដែលប្រទេសផ្សេងៗដ៏ទៃទៀត មិនទាន់មានការបញ្ជាក់នៅឡើយទេ។

នាមជាម្ចាស់លើប្រភេទកីឡាអុកចត្រង្គ អគ្គលេខាធិការរងដដែលរូបនេះ បានមើលឃើញថា ៤ប្រទេសខាងលើ សុទ្ធតែមានវប្បធម៌ និងក្បួនខ្នាតនៃការលេងអុក ប្រហាក់ប្រហែលគ្នា។ យ៉ាងណាក៏ដោយសហព័ន្ធបានដាក់ក្ដីរំពឹងឈ្នះមេដាយមាស យ៉ាងតិច ៣គ្រឿង ក្នុងចំណោម ៦មេដាយមាស។ «នៅក្នុងប្រភេទកីឡាអុកចត្រង្គនេះ មានមេដាយដល់ទៅ​៦មេ​ដាយមាស ហើយសមត្ថភាពកីឡាករកម្ពុជាយើង បច្ចេកទេស ទេពកោសល្យលេង ភាពប៊ិនប្រសប់ជាដើម គឹមិនចាញ់ប្រទេសជិតខាងនោះទេ។ សហព័ន្ធបានធ្វើការប្តេជ្ញាចិត្តជម្រុញកីឡាករ-កីឡាការិនី ហ្វឹកហាត់ក្នុងកម្រិតមួយដ៏ខ្ពស់ ដើម្បីបង្កើនគុណភាពសង្ឃឹមថាទទួលបានមេដាយមាស យ៉ាងតិច ៣គ្រឿង»។ សម្ដីរបស់ លោក  ប៊ិន គាសេង។

ជុំវិញការបង្ហាញខ្លួនលើកដំបូងក្នុងព្រឹត្តិការណ៍កីឡាស៊ីហ្គេម នៅក្រោយចប់ព្រឹត្តិការណ៍ លោក  ប៊ិន គាសេង រំពឹងបានបង្ហាញទៅអន្តរជាតិថា កម្ពុជា ជាប្រទេសដែលមានវប្បធម៌ មានល្បែងល្បងប្រាជ្ញាដែលបន្សល់ទុកពីដូនតា គឺមានភាពអស្ចារ្យណាស់ ផ្នែកខាងខួរក្បាល ផ្នែកខាងគិត ហើយលោកសង្ឃឹមថាប្រទេសជិតខាង ឬឆ្ងាយអីក៏គេអាចដឹងវប្បធម៌កម្ពុជា ដឹងពីបច្ចេកទេសនៃការហ្វឹកហាត់ខួរក្បាលលើប្រភេទកីឡាអុកចត្រង្គនេះ។

អុកចត្រង្គ ជាកីឡាប្រពៃណីរបស់កម្ពុជា នឹងបង្ហាញខ្លួនលើកដំបូងក្នុងព្រឹត្តិការណ៍កីឡាស៊ីហ្គេម ស្ថិតក្នុងចំណោមប្រភេទកីឡាអុក ដែលត្រូវបានបែងចែកជាពីរ គឺអុកចត្រង្គ និងអុកចិន (Xiangqi)៕

អត្ថបទ៖ មន្នីរ័ត្ន