កីឡា

U-22 វៀតណាម និងឥណ្ឌូណេស៊ី ជម្រុះកីឡាករដំណាក់កាលទី ១ ត្រៀមស៊ីហ្គេម ២០២៣ នៅកម្ពុជាហើយ

បានផុស

៣ ខែ មុន

នៅ

ថ្ងៃព្រហស្បតិ៍ ៩ មីនា ២០២៣

ដោយ

ក្រុមជម្រើសជាតិ U-22 វៀតណាម និងក្រុមជម្រើសជាតិ U-22 ឥណ្ឌូណេស៊ី បានបញ្ចប់ការធ្វើតេស្តកីឡាកររៀងៗខ្លួន ក្នុងដំណាក់កាលទី ១ រួចរាល់ហើយ ដើម្បីត្រៀមចូលរួមការប្រកួតព្រឹត្តិការណ៍អាស៊ីអាគ្នេយ៍ លើកទី ៣២ ឆ្នាំ ២០២៣ នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

– U-22 វៀតណាម ៖

U-22 វៀតណាម បានកោះហៅកីឡាករចំនួន ៤១ នាក់ ចូលរួមការធ្វើតេស្ត ដែលបានចាប់ផ្ដើមនៅថ្ងៃទី ០១ ខែមីនា និងបញ្ចប់ថ្ងៃទី ០៧ ខែមីនា ហើយនាមជាក្រុមការពារមេដាយមាស គេបានជម្រុះកីឡាករចំនួន ១៣ នាក់ ពីបញ្ជីឈ្មោះ ៤១ នាក់ ដើម្បីសម្រេចប្រមូលកីឡាករ ២៨ នាក់ ចូលរួមដំណាក់កាលទី ២។

ដំណាក់កាលទី ២ របស់ U-22 វៀតណាម ចាប់ផ្ដើមពីថ្ងៃទី ០៨ ដល់ថ្ងៃទី ១២ គ្រូបង្វឹក Troussier នឹងបង្ហាញបន្ថែមទៀតអំពីហ្គេម និងយុទ្ធសាស្ត្រដែលអនុវត្តចំពោះក្រុម។

– U-22 ឥណ្ឌូណេស៊ី ៖

ក្នុងដំណាក់កាលជ្រើសរើសកីឡាករ U-22 ឥណ្ឌូណេស៊ី បានចាប់ផ្ដើមដំណាក់កាលទី ១ ដោយមានកីឡាករ ៣៤ នាក់ចូលរួម ដែលបានចាប់ផ្ដើមនៅថ្ងៃទី ០១ ខែមីនា និងបញ្ចប់ថ្ងៃទី ០៨ ខែមីនា ក្រោយវៀតណាម ១ ថ្ងៃ។

U-22 ឥណ្ឌូណេស៊ី បានបញ្ចប់ការបោះជំរំហ្វឹកហាត់លើកដំបូងរបស់ខ្លួន ដោយបានជម្រុះកីឡាករ ១៧ នាក់ ពីចំណោមកីឡាករ ៣៤ នាក់។ ក្រុមនេះ នឹងបន្តការបោះជំរំហ្វឹកហាត់ ជាលើកទី ២ របស់ពួកគេឡើងវិញ នៅថ្ងៃសុក្រ ទី ១០ ដល់ថ្ងៃទី ១៦ ខែមីនា ឆ្នាំ ២០២៣។

គ្រូបង្វឹកលោក Indra Sjafri នឹងដឹកនាំកីឡាករចំនួន ៣៤ នាក់ម្ដងទៀត សម្រាប់ដំណាក់កាលទី ២ ដោយមានបន្ថែមកីឡាករថ្មីចំនួន ១៧ នាក់ផ្សេងទៀតដែលសមត្ថភាព នឹងត្រូវបានកោះហៅចូល ដើម្បីហ្វឹកហាត់រួមជាមួយកីឡាករ ១៧ នាក់ ដែលមិនបានជម្រុះចេញ។

ត្រលប់ទៅព្រឹត្តិការណ៍ស៊ីហ្គេម លើកទី ៣១ ឆ្នាំ ២០២១ (លើកមកឆ្នាំ ២០២២) ក្រុមទាំងពីរ វៀតណាម និងឥណ្ឌូណេស៊ី សុទ្ធតែបានឈរនៅលើក្ដារបំពាក់មេដាយ ដោយ U-23 វៀតណាម ទទួលបានមេដាយមាស ស្របពេល U-23 ឥណ្ឌូណេស៊ី ទទួលបានមេដាយសំរឹទ្ធ៕

អត្ថបទ ៖ មន្នីរ័ត្ន