លឹម ពិសុទ្ធ បង្ហើបថា ទៅហាត់នៅថៃលើកទី២នេះ​មានតាក់ទិចច្រើនជាងលើកទី១

ក្រុមជម្រើសជាតិអាយុក្រោម ២២ឆ្នាំកម្ពុជា (U-22) បានចេញទៅបោះជំរំហ្វឹកហាត់នៅប្រទេសថៃ ម្ដងទៀតហើយកាលពីព្រឹកថ្ងៃទី០៨ ខែមេសា ម្សិលមិញ ដើម្បីជាការត្រៀមខ្លួនសម្រាប់ព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ នៅលើទឹកដីរបស់ខ្លួន។

នេះជាលើកទី២ ដែលក្រុម U-22 កម្ពុជា ចេញទៅបោះជំរំហ្វឹកហាត់នៅប្រទេសថៃ ដោយកាលពីលើកទី១ គឺក្នុងអំឡុងពីថ្ងៃទី២៧ ខែកុម្ភៈ ដល់ថ្ងៃទី១៥ ខែមីនា ឆ្នាំ២០២៣ នៅកោះសាមុយ ខណៈលើកទី២ នេះមានរយៈពេល១០ថ្ងៃ ចាប់ពីថ្ងៃទី០៨ ដល់ថ្ងៃទី១៨ ខែមេសា ឆ្នាំ២០២៣។

លឹម ពិសុទ្ធ ដែលជាកីឡាករម្នាក់ក្នុងចំណោមកីឡាករ ២៣នាក់បាននិយាយថា ការបោះ​ជំរំហ្វឹក​ហាត់​នៅ​ថៃ លើកទី២នេះ អាចនឹងមានតាក់ទិចច្រើនជាកាលពីលើកទី១។ «កាល​ទៅ​បោះជំរំលើកទី១ គឺតាក់ទិចគាត់អត់សូវមានទេគឺគាត់បុកឱ្យយើងមានកម្លាំងសិន។ ប្រហែលបោះជំរំលើកចុងក្រោយនេះ អាចមានតាក់ទិចច្រើន»។ សម្ដីរបស់ខ្សែប្រយុទ្ធរបស់ក្លិបភ្នំពេញក្រោន។

ពិសុទ្ធ បានបន្ថែមទៀតថា ៖«សម្រាប់ក្រុមគឺបង្កើនកម្លាំងជាងមុន ហើយបន្ទាប់មកគឺលេងយល់ចិត្តគ្នាបានច្រើន។ កាយសម្បទារបស់យើងវិញ ឥឡូវ​នេះ​មានសាច់ជាងមុន ពីព្រោះយើង Gym ជាងមុន»។

ជាមួយគ្នាផងដែរ ដោយចាប់ពូលស្ថិតនៅជាមួយ ឥណ្ឌូណេស៊ី មីយ៉ាន់ម៉ា ហ្វីលីពីន និងទីម័រខាងកើត យុវជន​ឆ្នើម លឹម ពិសុទ្ធ បានចាត់ទុកថាក្រុមទាំងអស់សុទ្ធតែខ្លាំង និងមិនអាចធ្វេសប្រហែសបាន ប៉ុន្តែ​រូប​គេ​បានចាត់ទុក ឥណ្ឌូណេស៊ី ជាក្រុមដែលត្រូវផ្ដោតខ្លាំងជាងគេ។

បញ្ជាក់ថា ស៊ីហ្គេម លើកទី៣២ ដែលកម្ពុជាធ្វើជាម្ចាស់ផ្ទះនឹងចាប់ផ្ដើមពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣។ កីឡាបាល់ទាត់នឹងចាប់ផ្ដើម​ប្រកួត​មុនពិធីបើក ៦ថ្ងៃ ដោយសារត្រូវប្រកួតយូរថ្ងៃ ពោលគឺនឹងប្រកួតពីថ្ងៃទី២៩ ខែមេសា ឆ្នាំ២០២៣៕

អត្ថបទ៖ មន្នីរ័ត្ន