កីឡា

ព្រឹត្តិការណ៍ស៊ីហ្គេម ខេត្តព្រះសីហនុ ទទួលធ្វើជាម្ចាស់ផ្ទះរៀបចំការប្រកួតកីឡា ៣ ប្រភេទ

បានផុស

៣ years មុន

នៅ

ថ្ងៃអង្គារ ២ ឧសភា ២០២៣

ដោយ

ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី ៣២ (32 SEA GAME) ខេត្តព្រះសីហនុ ត្រូវបានទទួលធ្វើជាម្ចាស់ផ្ទះរៀបចំការប្រកួតកីឡា ៣ ប្រភេទ ៖ ទី១.កីឡាទូកក្តោង ,ទី២.កីឡាម៉ូតូទឹក ,និងទី៣.កីឡាបាល់ទះលើឆ្នេរខ្សាច់ ដែលរៀបចំប្រកួតនៅលើផ្ទៃសមុទ្រឆ្នេរសុខា ជាប់ទីលានតេជោ (ពយតាមូង) និងនៅពយជំទាវម៉ៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចប្រជុំសម្រាប់ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី ៣២ កាលពីរសៀលថ្ងៃទី ១ ឧសភា លោកស្រី អ៊ុច សោភា ប្រធានមន្ទីរអប់រំ យុវជន និងកីឡាខេត្តព្រះសីហនុ បានឲ្យដឹងថា កីឡា ៣ ប្រភេទ មានដូចជា កីឡាទូកក្តោង រៀបចំនៅឆ្នេរសុខា បានរៀបចំរួចរាល់ ១០០ ភាគរយ ដែលត្រូវចាប់ផ្ដើមធ្វើការប្រកួតនៅថ្ងៃទី ២ ខែឧសភា វេលាម៉ោង ១០ ព្រឹក និងបញ្ចប់ការប្រកួតនៅថ្ងៃទី ៨ ខែឧសភា ឆ្នាំ ២០២៣។ ចំពោះកីឡាម៉ូតូទឹក មិនទាន់រៀបចំ ដោយសារពេលបញ្ចប់ការប្រណាំងទូកក្តោង នឹងយកទីតាំងនេះ រៀបចំធ្វើការប្រណាំងកីឡាម៉ូតូទឹកបន្ត។ ដោយឡែកចំពោះការប្រកួតកីឡាបាល់ទះលើឆ្នេរខ្សាច់រៀបចំនៅពយជំទាវម៉ៅ ស្ថិតនៅឃុំបិតត្រាំង ស្រុកព្រៃនប់។

លោកស្រីបានបន្តថា ការប្រកួតកីឡាទាំងបីប្រភេទ ក៏មានយុវជនស្ម័គ្រចិត្តរបស់ ស.ស.យ.ក ចំនួន ១១៧ នាក់ ចូលរួមសហការជាមួយក្រុមការងារបច្ចេកទេស នៃគណៈកម្មការប្រកួតកីឡាស៊ីហ្គេម ក្នុងការជួយសម្របសម្រួល បដិសណ្ឋាកិច្ច ការរៀបចំសណ្ដាប់ធ្នាប់ ពិធីការ សម្រាប់ក្រុមកីឡានិមួយៗ ដើម្បីឲ្យការប្រកួត និងការស្នាក់នៅរបស់ប្រតិភូ កាន់តែមានភាពងាយស្រួល។

លោក គួច ចំរើន អភិបាល នៃគណៈអភិបាលខេត្តព្រះសីហនុ បានធ្វើការណែនាំដល់ក្រុមការងារបច្ចេកទេសប្រកួតកីឡាស៊ីហ្គេម ត្រូវបណ្ដុះបណ្ដាលដល់យុវជនស្ម័គ្រចិត្តពីរបៀបរបប នៃការសម្របសម្រួលដល់ក្រុមប្រតិភូកីឡាដែលមកចូលរួមប្រកួតស៊ីហ្គេមលើកទី ៣២ នៅខេត្តព្រះសីហនុ ស៊ីហ្គេម។

លោកអភិបាលខេត្ត បានមានប្រសាសន៍ថា រាជរដ្ឋាភិបាល បានធានាការស្នាក់នៅ និងផ្តល់អាហារជូនប្រតិភូកីឡា នៃបណ្ដាប្រទេសដែលបានមកចូលរួមប្រកួតកីឡាស៊ីហ្គេមនៅក្នុងប្រទេសកម្ពុជា ពិសេសនៅខេត្តព្រះសីហនុ ដូច្នេះគ្រប់មន្ទីរ អង្គភាពពាក់ព័ន្ធទាំងអស់ក្នុងខេត្ត ត្រូវមានការទទួលខុសត្រូវដោះស្រាយបញ្ហាប្រឈមនានានៅតាមគោលដៅរបស់ខ្លួនឲ្យបានល្អ។

ទន្ទឹមនោះ រដ្ឋបាលខេត្ត បានធ្វើការផ្សព្វផ្សាយជូនដល់សាធារណជន ដើម្បីចូលរួមលើកស្ទួយវិស័យកីឡាក្នុងព្រឹត្តិការណ៍កីឡាស៊ីហ្គេមលើកទី ៣២ ឲ្យបានទូលំទូលាយជូនដល់ប្រជាពលរដ្ឋ ភ្ញៀវទេសចរជាតិ អន្តរជាតិ បានទស្សនាដោយសេរី ប្រកបដោយសេចក្ដីសប្បាយរីករាយនាពេលខាងមុខ។

លើសពីនេះ រដ្ឋបាលខេត្ត ក៏បានរៀបចំផ្ទាំងស្លាយ និងផ្ទាំង LCD សម្រាប់ធ្វើការផ្សព្វផ្សាយបន្តផ្ទាល់ នៃការប្រកួតកីឡាស៊ីហ្គេមលើកទី ៣២ នៅតាមទីតាំងមួយចំនួនក្នុងក្រុងព្រះសីហនុ ដើម្បីឲ្យប្រជាពលរដ្ឋបានទស្សនាសប្បាយរីករាយគ្រប់ៗគ្នា។

សូមបញ្ជាក់ថា ការប្រកួតកីឡាទូកក្ដោងស៊ីហ្គេម ២០២៣ ចាប់ផ្ដើមដំណើរការពីថ្ងៃទី ០២ ខែឧសភា នេះតទៅហើយ នៅខេត្តព្រះសីហនុ ដល់ថ្ងៃទី ០៨ ខែឧសភា មាន ៣ វិញ្ញាសា គឺ បុរស, នារី និងចម្រុះ មាន ៦ ប្រទេស ចូលរួម មានម្ចាស់ផ្ទះកម្ពុជា, ថៃ, សិង្ហបុរី, ម៉ាឡេស៊ី, ហ្វីលីពីន និងវៀតណាម។

ចំពោះកីឡាបាល់ទះលើឆ្នេរខ្សាច់ ប្រកួតនៅពយជំទាវម៉ៅ ចាប់ផ្ដើមការប្រកួតចាប់ពីថ្ងៃទី ១១ ខែឧសភា និងបញ្ចប់ថ្ងៃទី ១៦ ខែឧសភា ឆ្នាំ ២០២៣ និងកីឡាម៉ូតូទឹក ចាប់ផ្ដើមប្រកួតថ្ងៃទី ១៣ ខែឧសភា និងត្រូវបញ្ចប់ថ្ងៃទី ១៦ ខែឧសភា ឆ្នាំ ២០២៣៕

អត្ថបទ ៖ សំអឿន

Related Topics:ខេត្តព្រះសីហនុ កីឡាស៊ីហ្គេម

ព័ត៌មានអន្ដរជាតិ១៩ ម៉ោង ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេដ្ឋកិច្ច៣ ថ្ងៃ ago

ធនាគារ ARDB ចាក់បញ្ចូលទុនលើស្វាយចន្ទី និងដំឡូងមី

ព័ត៌មានជាតិ១ សប្តាហ៍ ago

រដ្ឋបាលខណ្ឌកំបូល សហការជាមួយក្រុមហ៊ុនមីនេបៀ ប្រើប្រាស់កម្លាំងជាង ៨០០នាក់ សម្អាតអនាម័យនៅតាមដងផ្លូវ

សេចក្ដីជូនដំណឹង២ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា