យប់​មិញ Ronaldo ជាប់​កំណត់​ត្រា​ពិភព​លោកថ្មីមួយទៀត

ប្រធាន​ក្រុម​បាល់ទាត់​ជម្រើស​​ជាតិ​ព័រទុយហ្គាល់ Cristiano Ronaldo ​បាន​បង្កើត​កំណត់​ត្រា​ពិភព​លោក​​ហ្គីនណេស (Guinness World Record) ថ្មីមួយទៀតកាល​ពី​យប់​មិញ ​បន្ទាប់​ពី​បាន​បង្ហាញ​ខ្លួនឲ្យ​ក្រុម​ជម្រើស​ជាតិចំនួន​២០០​លើក​នៅពេល​ប្រកួត​ជា​មួយជម្រើស​ជាតិអ៉ីស្លង់។

ការ​បង្ហាញ​ខ្លួន​លើក​ទី​២០០​ឲ្យ​ក្រុម​បាល់ទាត់​ជម្រើស​ជាតិ​ព័រទុយហ្គាល់​ ដូច្នេះ Ronaldo បាន​ក្លាយ​ជា​​កីឡាករ​បាល់ទាត់​ទី​១​ក្នុង​ប្រវត្តិ​សាស្ត្រ​លើ​លោក​ដែល​បាន​បង្ហាញ​ខ្លូន​លើ​ទី​លាន​ឲ្យ​ជម្រើស​ជាតិ​ច្រើន​ជាង​គេ​បំផុត និងត្រូវ​បាន​ស្ថាប័ន​កំណត់​ត្រា​ពិភព​លោក​ផ្តល់​លិខិត​បញ្ជាក់​កំណត់​ត្រា​ថ្មី​មួយ​ទៀត។ រូប​គេ​ក៏​ជា​កីឡាករ​បាល់ទាត់​ដែល​រក​បាន​គ្រាប់​ឲ្យ​ជម្រើស​ជាតិ​បាន​ច្រើន​ជាង​គេ​បំផុត​ដែរ។

ស្ថិត​ក្នុង​វ័យ​៣៨​ឆ្នាំ Ronaldo បាន​ស៊ុត​គ្រាប់​បាល់​ជ័យជម្នះ​​នៅ​នាទី​៨៩​ឲ្យ​ព័រទុយហ្គាល់​ឈ្នះ​ជម្រើស​ជាតិ​អ៉ីស្លង់ដោយ​លទ្ធផល ០-១ ​ដើម្បី​ឈរ​លើ​កំពូល​តារាង​ពូល J ដោយ​ប្រកួត​៤​លើក​ ឈ្នះ​ទាំង​៤​លើក មាន​១២​ពិន្ទុ ក្នុង​យុទ្ធនាការ​ជម្រុះ​ជើង​ឯកអឺរ៉ុប Euro 2024។

រហូត​ដល់​ពេល​នេះ Ronaldo បាន​បង្ហាញ​ខ្លួន​ឲ្យ​ក្រុម​បាល់ទាត់​ជម្រើស​ជាតិ​ព័រទុយហ្គាល់​រយៈ​ពេល​២០​ឆ្នាំ​ដោយរក​បាន​១២៣​គ្រាប់ គិត​ចាប់​តាំង​ពី​បង្ហាញ​ខ្លួន​លើ​ឆាក​អន្តរជាតិ​លើក​ដំបូង​កាល​ពី​ឆ្នាំ​២០០៣។ រូប​គេ​នៅ​​តែ​បង្ហាញ​ខ្លួន​ឲ្យ​ជម្រើស​ជាតិ​ព័រទុយហ្គាល់​យ៉ាង​ទៀងទាត់ បើ​ទោះ​ជា​​បាន​ចាក​ចេញ​ពី​​អឺរ៉ុប ទៅ​កាន់​លីគ​អារ៉ាប៊ីសាអូឌីត ក្រោយ​ពេល​ជើង​ឯក​ពិភព​លោក​ឆ្នាំ​២០២២។

បើ​និយាយ​ពី​ក្លិប​អាជីព​​វិញ ម្ចាស់​ពាន​រង្វាន់ Ballon d’Or ៥​សម័យ​កាល​រូប​នេះបាន​ចាប់​ផ្តើម​ពី Sporting Lisbon នៅ​ប្រទេស​កំណើត និង​​បាន​ទៅ​​អង់គ្លេស​ Manchester United, អេស្ប៉ាញ Real Madrid និង​អ៊ីតាលី Juventus មុន​ពេល​ទៅ Al Nassr៕

ខាង​ក្រោម​ជា​កីឡាករ​១០​រូប​ដែល​បង្ហាញ​ខ្លួន​ឲ្យ​ជម្រើស​ជាតិ​ច្រើន​ជាង​គេ​បំផុត៖

អត្ថបទ៖ វីរបុត្រ