កីឡា

តើ សៀង ចន្ធា ទទួលបាន៦ម៉ឺនដុល្លារ១ឆ្នាំនៅកាតារដូចអ្នកខ្លះបង្ហោះទេ?

បានផុស

៨ ខែ មុន

នៅ

ថ្ងៃពុធ ២៦ កក្កដា ២០២៣

ដោយ

ការផ្ទេរក្នុងលក្ខខណ្ឌខ្ចីជើងរបស់កីឡាករកម្ពុជា សៀង ចន្ធា ពីក្លិបបឹងកេតទៅក្លិប Al Shahaniya SC បានធ្វើឲ្យមានការចាប់អារម្មណ៍យ៉ាងខ្លាំងពីអ្នកគាំទ្របាល់ទាត់កម្ពុជា និងបានក្លាយជាកីឡាករបាល់ទាត់កម្ពុជាទី១បានប្រកបអាជីពបាល់ទាត់នៅលីគទី២របស់ប្រទេសកាតារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រៅពីការចាប់អារម្មណ៍លើឱកាសលេងនៅលីគទី២របស់ប្រទេសកាតារ អ្នកគាំទ្រមួយចំនួនក៏ចាប់អារម្មណ៍លើតម្លៃផ្ទេរ និងតម្លៃខ្លួនដែលកីឡាករកម្ពុជារូបនេះទទួលបានដែរ ពីព្រោះមិនថានៅតំបន់អាស៊ាន អាស៊ី ឬពិភពលោកតម្លៃនៃការផ្ទេរ និងតម្លៃខ្លួនជាចំណុចដែលមហាជនចាប់អារម្មណ៍ខ្លាំង។

នៅព្រឹកថ្ងៃពុធ ទី២៦ ខែកក្កដានេះ មានផេកខ្លះបានបង្ហោះថា សៀង ចន្ធា ទទួលបានតម្លៃខ្លួនសរុប៦ម៉ឺនដុល្លារអាមេរិកសម្រាប់ការលេងឲ្យក្លិប Shahaniya SC ក្នុងមួយរដូវកាល។

ជុំវិញតម្លៃខ្លួននេះ លោក បែ មករា អ្នកចាត់ការទូទៅរបស់ក្លិបបឹងកេតបានប្រាប់«កម្ពុជាថ្មី»ថា លោកមិនដឹងគេទទួលបានទិន្នន័យមកពីណាទេដែលលើកឡើងពី សៀង ចន្ធា ទទួលបាន៦ម៉ឺនដុល្លារក្នុងមួយឆ្នាំនោះ។

លោកបាននិយាយខ្លីថា ៖«ដូចជាមិនអីចឹងទេ ខ្ញុំអត់ដឹងថា គេយកទិន្នន័យមកពីណាទេ តែអ្វីដែលខ្ញុំអាចបញ្ជាក់គឺដូចជាមិនអីចឹងទេ។ កិច្ចសន្យាមានលក្ខខណ្ឌលំអិតច្រើនទៀត ពេលខ្លះយើងមិនអាចនិយាយបានទេ»។

សៀង ចន្ធា បានត្រួសត្រាយផ្លូវសម្រាប់ខ្លួនឯងក្នុងការបោះជំហានទៅក្លិបអាជីពធំនៅអាស៊ី និងអឺរ៉ុប ហើយក៏ជាការបើកផ្លូវឲ្យបណ្តាប្រទេសផ្សេងៗបានស្គាល់វិស័យបាល់ទាត់កម្ពុជា៕